Shunday olijanob muhabbatlar borki, ular rashkka o'rin qoldirmaydi.
F. LAROSHFUKO
Chinakamiga sevgan odam rashk qilmaydi. Muhabbatning asl mohiyati - ishonch. Bordi-yu, muhabbatdan shu ishonchni tortib olingchi, unda siz uning o'z kuchiga bo'lgan ishonchi, davomiyligi, jamiki nurafshon tomonlari - binobarin, barcha ulug'vorligini tortib olgan bo'lasiz.
R. STIL
Muhabbatning rashkdan yaqinroq do'sti bo'lmaganidek, undan battarroq dushmani ham yo'q: bu ayni temirning o'zida paydo bo'lib, keyin uning qattor dushmaniga aylanadigan zangning o'zginasidir.
J. BRUNO
Eng kuchli nafrat - eng kuchli muhabbat mahsulidir.
T. FULLER
Rashk - bamisoli bir maxluq, u o'zidan-o'zi boshlanib,yo'q gaplarni yuzaga chiqaradi.
V. SHEKSPIR
Rashkchilar bahona axtarib o'tirishmaydi, ular shu sababsiz kasalga mubtalo bo'lganliklari tufayli ham rashkchidirlar.
V. SHEKSPIR
Rashkchilar chumolini - fil, qumursqani - bahaybat maxluq, taxminni - rost qilib ko'rsatadigan vahima oynagi orqali qaraydilar.
M. SERVANTES
Rashkka hammasi ravshan - ammo yo'qdir isboti!
M. Yu. LERMONTOV
Rashk shubhalari qutqusi bilan mutlaqo gunohsiz odamni ham haqoratlab qo'yish mumkin.
V. SHEKSPIR
Rashk oshiq uchun azob-uqubat, ma'shuqa uchun ranj-iztirob manbaidir.
K. GOLDONI
Rashk o'zingga boshqalardan ko'ra ko'proq yomonlik tilab olish san'atidir.
A. DYUMA (o'gli)
Jazavali rashk manfaatparastlik va shuhratparastlik qilgandan ham battarroq jinoyatlarni yuzaga keltiradi.
F. VOLTER
Jazavali sevgidan xuddi nafratdan qo'rqqanday qo'rqish kerak. Muhabbatki mustahkammi, u hamisha beg'ubor va osoyishtadir.
G. TORO
Kuchli muhabbat bilan yomon shubha murosa qilolmaydi.
P. ABELYAR
Yoqtirmaslik, hadik, shubha hamda rashk hurmat va ishonchning yetishmasligidan kelib chiqadi.
D. I. PISAREV
Erkaklar rashki ularning qon-qoniga singib ketgan shaxsiyatparastligi, vujudini tuyqusdan qoplab olgan izzattalabligi va soxta manmanligining qo'zishidan paydo bo'ladi.
O. BALZAK
Rashkni muhabbatga xos zarurat deb hisoblash kechirilmas anglashilmovchilikdir.
V. G. BELINSKIY