Pedagoglar qayta tayyorlov va malaka oshirish kurslaridan onlayn tarzda o'tishlari mumkin bo'ladi

Vazirlar Mahkamasining 2017 yil 27 fevralidagi 103-sonli qaroriga muvofiq, oliy ta`lim muassasalarining rahbar va pedagog kadrlari qayta tayyorlov kurslari va malaka oshirish to'g'risidagi Nizomiga tuzatishlar kiritildi. Bu haqida Norma.uz saytida xabar berildi. 

Unga ko'ra, oliy ta`lim muassasalaridagi rahbar va pedagog kadrlarning qayta tayyorlov va malaka oshirish kurslari o'quv dasturlarini takroriy o'zlashtirishi ularning asosiy faoliyatidan uzilmagan holatda mustaqil ravishda yoki masofadan o'qish usullari asosida amalga oshiriladi. 
 
Masofadan o'qitish usullariga asoslangan takroriy kurslarning o'quv mashg'ulotlari onlayn- va offlayn-shaklda tashkil qilinadi. Biroq tinglovchilarni baholash vazifasi (joriy nazorat) faqat onlayn-shaklda tashkil etiladi. 
 
Qayta tayyorlov va malaka oshirish kurslari o'quv dasturlarini mustaqil yoki masofaviy ta`lim texnologiyalari asosida o'zlashtirayotgan tinglovchilar yakuniy attestatsiyaga qo'yiladi. Yakuniy attestatsiya oliy ta`lim muassasalari qoshidagi attestatsiya komissiyasida o'tkaziladi. 
 
Uzrsiz sabablarga ko'ra, o'quv mashg'ulotlarini o'tkazib yuborgani uchun qayta tayyorlov va malaka oshirish kurslari tinglovchilari qatoridan chiqarib yuborilgan oliy ta`lim muassasalarining rahbar va pedagogik kadrlari pulli asosda kurslarni o'tashlari kerak bo'ladi. Qayta tayyorlash va malaka oshirish takroriy kurslari 288 soat hajmida tashkil etiladi. 
 
Bundan tashqari, endi oliy ta`lim muassasalarining pedagogik xodimlariga asosiy ish joyi bilan mehnat shartnomasini to'xtatilgan kundan boshlab 1 yil davomida pulli asosda qayta tayyorlov va malaka oshirish kurslaridan o'tish ruxsat etiladi. 
  
Hujjatga shuningdek boshqa ba`zi o'zgarishlar ham kiritilgan. 
 
Mazkur hujjatning to'liq matni bilan "O'zbekiston Respublikasi Qonunchiligi" axborot-qidiruv tizimida tanishish mumkin. 

Katagoriya:Jamiyat
Joylangan vaqt: March 10, 2017
Loading...
Яндекс.Метрика