Toshkentda ko'z ko'rib, quloq eshitmagan odam o'g'irligi sodir etildi

Shu yilning fevral oyida Toshkent shahri Uchtepa tumanida shu paytgacha ko'z ko'rib, quloq eshitmagan odam o'g'irlash jinoyati sodir etildi. Bu haqda Toshkent shahar IIBB boshlig'i o'rinbosari Doniyor Toshxo'jayev hikoya qilib berdi. 

Uning so'zlariga ko'ra, besh kishidan iborat guruh xorij filmlarida odam o'g'irlash bilan bog'liq ssenariyni hayotda sinab ko'rishga ahd qilgan. 

Toshxo'jayevning aytishicha, «aslida, bu ko'rgilikning boshlanishiga restoranlardan birida kamtarlikni unutib, tilidan ilingan tadbirkorning o'zi aybdor». U do'stlari davrasida g'arazgo'ylar bo'lishi mumkinligini xayoliga ham keltirmay, boyligi, xonadonlari-yu, pullarining miqdorini aytib maqtangan. 

Shundan so'ng, bundan xabar topgan besh kishi o'zaro birlashib, uni o'g'irlash rejasini tuzadi, bunda Amerika filmlaridagi shunga o'xshash voqealardan o'rnak olishadi.

Xususan, osongina mo'may daromad topish ilinjidagi jinoyatchilar tadbirkorni o'g'irlagach, uning bo'yniga go'yoki «bomba» osishadi va jabrdiyda harakatlarini kuzatib turish maqsadida videoqo'ng'iroq qilish imkonini beruvchi mobil dasturlardan foydalanishadi. Telefon qashqadaryolik noma`lum kishi nomiga rasmiylashtirilgan bo'ladi. G'arazgo'ylar tadbirkordan dastlab tovon sifatida 200 ming AQSh dollari talab qilishadi, agar talablari bajarilmasa, bo'yniga osilgan «bomba» portlashini aytib qo'rqitishadi. 

Ta`kidlanishicha, tadbirkor ham garchi hayoti qil ustida turgan bo'lsa-da, bo'sh kelmaydi, o'zining anoyi emasligini ko'rsatib jinoyatchilar bilan savdolashadi hamda tovon pulini 10 marta kamaytirishga, ya`ni 20 ming dollarga tushirishga erishadi. 

So'ngra, jinoyatchilar bilan kelishuvni pishiq-puxta qilgan jabrlanuvchi tadbirkor ularning «bomba» haqidagi nag'malariga ishonmay, to'g'ri ichki ishlar idorasiga boradi. 

Olib borilgan tezkor tadbirlar natijasida jinoyatchilar ushlandi. Hozirda, surishtiruv ishlari olib borilmoqda. Toshxo'jayevning aytishicha, garchi yakuniy xulosani sud mahkamasi bersa-da, ushbu jinoiy guruh a`zolari 10 yilgacha qamalishi mumkin.  

Katagoriya:Jamiyat
Joylangan vaqt: March 10, 2017
Loading...
Яндекс.Метрика