Ota-onasini boqishdan bosh tortuvchi shaxslarga nisbatan qat`iy jazo tayinlanadi

2017 yilning 9 mart kuni Shayxontohur tumani Beltepa mahalla fuqarolari yig'inida sud ijrochilari va mahalla faollari ishtirokida hududda aliment davriy to'lovlarni o'z vaqtida to'lamay yurgan shaxslarga huquqiy tushuntirishlar berish yuzasidan uchrashuv o'tkazildi.

Uchrashuvda Shayxontohur tumani bo'yicha jami 1896 ta aliment davriy to'lovlari bajarilishining ahvoli, o'z farzandiga moddiy yordam bermay kelayotgan qarzdor shaxsga nisbatan jinoiy javobgarlik masalalari qo'llanilayotgani aytib o'tildi.

Yig'ilishda Sud departamentining Toshkent shahar hududiy boshqarmasi bo'lim boshlig'i Sadriddin Xidirov, Sud ijrochilarining Shayxontohur tuman bo'limi boshlig'i M.Usmonov, Toshkent shahar prokuraturasi 17-bo'lim boshlig'i Abduqodir Donayevlar va tuman xotin qizlar qo'mitasi mutaxassislari hamda Beltepa mahalla fuqarolar yig'ini raisi ishtirok etdi.

Yig'ilishda voyaga yetgan mehnatga layoqatli farzandlar o'z ota –onalari haqida g'amxo'rlik qilishga majbur ekanligi, keyingi vaqtlarda bu holatga befarqlik bilan qaralishi achinarli hol ekanligi ta`kidlandi. Ushbu shaxslarga nisbatan O'zbekiston Respublikasi Jinoyat kodeksining 123 moddasida keskin choralar ko'rish tayinlab qo'yilgan. Unga ko'ra, voyaga yetgan shaxslarning mehnatga layoqatsiz va moddiy yordamga muhtoj bo'lgan ota-onani yoki ularning o'rnini bosuvchi shaxslarni moddiy ta`minlashdan bo'yin tovlashi, ya`ni ularni moddiy jihatdan ta`minlash uchun sudning hal qiluv qaroriga binoan undirilishi lozim bo'lgan mablag'ni uch oydan ortiq muddat mobaynida to'lamasligi — eng kam oylik ish haqining ellik baravarigacha miqdorda jarima yoki uch yilgacha axloq tuzatish ishlari yoxud olti oygacha qamoq bilan jazolanadi. Yig'ilishda aynan shunday shaxslarga nisbatan jazo tayinlanishi muqarrar ekanligi aytib o'tildi.

Shuningdek mahalla faollariga yoshlarning bo'sh vaqtlarini sermazmun o'tkazishda sport bilan shug'ullanishi, qo'shimcha biror kasb bilan egallashida kerakli shart–sharoitlar yaratilishi bo'yicha ayrim masalalar vakolat doirasida kelishib olindi.

Yig'ilishda mahalla fuqarolari yig'ini faollarining savollariga Toshkent shahar prokuraturasi 17- bo'lim boshlig'i Abduqodir Donayev javob berib o'tdi.

Katagoriya:Jamiyat
Joylangan vaqt: March 10, 2017
Loading...
Яндекс.Метрика