O'qishga kiritib qo'yishni va`da qilgan firibgar dugonalar qo'lga olindi

Oqila ayollar jamiyatdagi muvozanatni, ya`ni poklik, halollik, samimiyat va adolat muhitini saqlab turadilar. Biroq ayrim ayollar ham borki, ular yuqorida keltirilgan ta`riflarga zid harakat qilayotganliklari afsuslanarli holatdir. Xususan, marg'ilonlik Munisa Zafarova va Zulfiya Asadova (ism-familiyalar o'zgartirilgan) ana shunday ayollardan ekan, deb yozadi “Huquq” gazetasi. 

Munisa Zafarova toshkentlik dugonasi Zulfiya Asadova bilan jinoiy til biriktirib, o'tgan yilning kuz fasli boshlarida bekobodlik tanishining qizini 7 ming AQSh dollari evaziga oliy ta`lim muassasasiga qo'shimcha ravishda o'qishga kiritib qo'yishini aytib, uning ishonchiga kiradi. Oradan uch oy o'tib, uning qizini Toshkent Davlat iqtisodiyot universitetiga qo'shimcha ravishda shartnoma asosida o'qishga kiritganliklari haqida yolg'on gapirib, uning shartnoma to'lovi uchun deb, 3 mln. so'm miqdorida pul olishadi.

Firibgarlar jinoiy harakatlarini davom ettirib, yana bir sodda insonni chuv tushirishadi. Bu safar bo'kalik tanishining o'g'lini Davlat test markazidagi tanishlari orqali O'zbekiston Davlat jahon tillari universitetiga 8 ming AQSh dollari evaziga o'qishga kiritib qo'yishni va`da qilishib, uning ishonchiga kirishadi. Keyin esa...

Bu ikki ayolning makr to'rlariga o'ndan ortiq fuqarolar ilinishdi. Ularning va`dalariga shubha bilan qarovchilarga esa Munisa Oliy ta`lim vazirligida ishlashi to'g'risidagi soxta guvohnomani ko'rsatib, ularni xotirjam qiladi.

Ayollar pul topishning oson yo'lini o'rganib olishgach, o'z “faoliyat”larini kengaytirishadi. Endi ular, nafaqat o'qishga kiritib qo'yishni, balki o'qishga kirish uchun kimgadir farzandiga tayyorlov kursida o'qitish, kimgadir farzandini repetitor orqali tayyorlab berishni va`da qilishib, ularning ko'p miqdordagi pullarini olishadi va o'z ehtiyojlari uchun sarflab yuborishadi.

Vaqti kelib, Munisa Zafarova dugonasi Zulfiya Asadova bilan pullarni taqsimlay olmasdan, o'zaro janjallashib qolishadi. Zulfiya aldangan bekobodlik tanishlarini topib, ularni Munisaning barcha kirdikorliklarini ochib, ariza yozishga undaydi. Zulfiya huquqni muhofaza qiluvchi organ xodimlariga ustozlik vazifasini Munisa bajarganini, jinoiy yo'l bilan topilgan pullarning 80 foizni u olganini aytib, jazodan qutulib qolishni ko'zlaydi. Biroq...

Sud hukmi bilan ikki “dugona” qilmishlariga yarasha qonuniy jazolarini olishdi.

Katagoriya:Jamiyat
Joylangan vaqt: March 10, 2017
Loading...
Яндекс.Метрика