2023 yil yanvar oyida Alina Kabayeva nomidagi badiiy gimnastika akademiyasi Rossiyaning birinchi federal hududi - «Sirius»da joylashgan kadastr qiymati 2,2 milliard rubl bo‘lgan binoni «Gazprom» tuzilmalaridan bepul olgan. Bu haqda 31 mart, juma kuni e’lon qilingan «Mojyem ob’yasnit» Telegram-kanalining surishtiruvida aytiladi.
Surishtiruv mualliflari Kabayeva bilan bog‘liq bo‘lgan ikkita yuridik shaxsning mulki va mulkchilik tuzilmasini o‘rgandi. Birinchisi, uning «Nebesnaya gratsiya» badiiy gimnastika akademiyasi. Yuridik shaxslarning yagona davlat reestri ma’lumotlariga ko‘ra, 2023 yil mart oyi boshida Kabayeva ushbu uyushmaning direktori bo‘lgan, reyestrda «Nebesnaya gratsiya»ning rasmiy egalari haqida hech qanday ma’lumot yo‘q.
Kabayevaning ushbu akademiyasi o‘quv bazasi «Sirius» hududida joylashgan, deyiladi «Nebesnoy gratsii» saytida. Rosreyestr ma’lumotlariga ko‘ra, 2022 yil oktyabr oyida «Gazprom investgazifikatsiya» MChJ ushbu binoning egasi bo‘lgan. Bir oy o‘tgach, u ko‘chmas mulkni «Gazprom»ning boshqa shu’ba korxonasiga - «Fond podderjki sotsialnyx initsiativ Gazproma»ga sotgan. Jurnalistlar tomonidan e’lon qilingan Rosreyestr ko‘chirmasiga ko‘ra, joriy yilning yanvar oyida «Gazprom» 2,2 milliard rubl turadigan binoni boshqa kompaniya - «Akademiya xudojyestvennoy gimnastiki»ga sovg‘a qilgan. Kompaniya mulk qabul qilinishidan uch hafta oldin tuzilgan.
Fevral oyi oxirida «Proyekt» nashri Kabayevaning mol-mulki va uning Rossiya prezidenti Vladimir Putin bilan munosabatlari bo‘yicha katta surishtiruv e’lon qildi. «Natsionalnaya media gruppa» direktorlar kengashi raisi lavozimini egallab turgan Kabayeva soxta shaxslar orqali taxminan 120 million dollarlik ko‘chmas mulkka, jumladan Putinning Valdaydagi qarorgohi hududidagi uyga egalik qiladi, deya xabar berdi «Proyekt». Umuman olganda, nashr Moskva, Sochi va Valdaydagi 20 dan ortiq mulkni sanab o‘tdi.
Joylangan vaqt : (1 Aprel 2023 10:00)
Manba: www.kun.uz
Tush.UZ - Tushlar tabiri