Tush.UZ - Tushlar tabiriTurkiya Bashar Asad rejimi ag‘darilganidan so‘ng suriyalik qochqinlarning o‘z vatanlariga xavfsiz va ixtiyoriy ravishda qaytishini osonlashtirish uchun Suriya bilan chegaradagi Yayladag‘i chegara punktini ochadi. Bu haqda 9 dekabr, dushanba kuni Turkiya prezidenti Rajab Toyyib Erdo‘g‘an ma’lum qildi. Bu nazorat punkti 2013 yildan beri yopiq.
«Kechadan beri Suriyada qorong‘i davr tugadi va yangi, yorqin sahifa boshlandi, Suriyadagi kuchli o‘zgarishlar shamoli barcha suriyaliklarga, ayniqsa qochqinlarga foyda keltiradi», dedi Turkiya prezidenti vazirlar mahkamasi majlisida.
Turkiya va Anqara tomonidan qo‘llab-quvvatlanayotgan Suriya milliy armiyasi (SMA)ning Suriya shimolidagi kurd jangchilariga qarshi olib borayotgan harbiy amaliyotlari haqida gapirar ekan, Erdo‘g‘an Turkiya boshqa davlatlar hududiga da’vo qilmasligini, biroq «o‘z chegaralarida terrorizmga toqat qilmasligini» ta’kidladi.
Turkiya Suriyadan 3 mlnga yaqin qochqinni qabul qildi
Suriya bilan 900 kilometrlik chegaraga ega Turkiya 2011 yilda fuqarolar urushi boshlanganidan buyon qariyb uch million suriyalik qochqinni qabul qildi. Bashar Asad rejimi ag‘darilgach, yuzlab suriyaliklar o‘z vatanlariga qaytish uchun chegaraga kela boshladi.
Yevropa davlatlari suriyaliklarga boshpana berishni to‘xtatyapti
Germaniya migratsiya idoralari Suriya fuqarolari uchun boshpana so‘rovlarini ko‘rib chiqishni vaqtincha to‘xtatdi. Bu ma’lumotni 9 dekabr kuni Germaniya Ichki ishlar vazirligi matbuot kotibi Sonya Kok tasdiqladi. Der Spiegel jurnali Migratsiya va qochqinlar bo‘yicha federal idoraning (BAMF) qarori haqida birinchi bo‘lib xabar berdi.
Avstriya hukumati 9 dekabr kuni suriyaliklarning boshpana so‘rovi bo‘yicha xuddi shunday qaror qabul qilgan. Mamlakat Ichki ishlar vazirligi ma’lumotlariga ko‘ra, 7300 ga yaqin dastlabki murojaatlarni ko‘rib chiqish to‘xtatilgan. Oldindan tasdiqlangan barcha arizalar ham qayta tekshirilishi kerak. Suriyalik oilalarni birlashtirish dasturi ham to‘xtatilgan. «Shu nuqtayi nazardan, men vazirlikka Suriyaga repatriatsiya va deportatsiya bo‘yicha tartibli dastur tayyorlash bo‘yicha ko‘rsatma berdim», dedi Avstriya ichki ishlar vaziri Gerxard Karner.
Kecha kun davomida ma’lum bo‘lishicha, Yevropaning boshqa davlatlari: Buyuk Britaniya, Daniya, Italiya, Niderlandiya, Norvegiya, Shveytsariya va Shvetsiya ham Suriyadan qochqinlarning boshpana so‘rovlarini ko‘rib chiqishni to‘xtatish to‘g‘risida qaror qabul qilgan yoki buni qabul qilishga tayyorlanmoqda. Fransiya ham buni istisno etmayapti.