Tush.UZ - Tushlar tabiriSuriya bosh vaziri Muhammad G‘ozi al-Jaloliy hokimiyatni Bashar Asad rejimini ag‘dargan isyonchilar yetakchilariga o‘tkazishga tayyorligini aytdi, deb xabar bermoqda Reuters 9 dekabr, dushanba kuni. Unga ko‘ra, jarayon bir necha kunga cho‘zilishi mumkin.
«Suriyada sodir bo‘lgan voqealar inqilobdir», — deya bosh vazirning murojaatidan iqtibos keltiradi dpa agentligi.
Asad rejimining ag‘darilishiga rahbarlik qilgan «Hay’at Tahrir ash-Shom» guruhi yetakchisi Abu Muhammad al-Juloniy 9 dekabrga o‘tar kechasi bosh vazir bilan uchrashib, o‘tish davri hukumatini tuzish masalasini muhokama qildi, deya xabar bermoqda Reuters agentligi.
Al Jazeera telekanali ma’lumotlariga ko‘ra, o‘tish davri hukumatini guruh yetakchisining yaqin hamkori deb atalgan Muhammad al-Bashir boshqaradi. U vazirlar mahkamasini tuzadi.
Asad harbiylari uchun amnistiya
Guruh rahbariyati, shuningdek, Bashar Asad davrida xizmatga chaqirilgan barcha harbiylar uchun amnistiya e’lon qilindi, deb xabar beradi dpa. Harbiylarning xavfsizligi kafolatlanadi va ularga qarshi barcha hujumlar taqiqlanadi, deya xabar beradi agentlik guruhning Telegramʼdagi bayonotidan parchalarga tayanib.
Guruh boshchiligidagi isyonchi kuchlar noyabr oyi oxirida Suriya hukumat kuchlariga qarshi yirik hujum boshladi. Bir necha kun ichida ular mamlakatning ikkinchi yirik shahri Halabga kirib, yana bir qancha yirik markazlarni o‘z nazoratiga olishga muvaffaq bo‘ldi. 8 dekabr kuni ular davlat televideniyesi orqali Damashqqa kirib, Asad rejimini ag‘darganliklarini e’lon qildilar. Bashar Asadning o‘zi va uning oilasi Rossiyaga qochdi va u yerda boshpana oldi, deya xabar beradi Kreml.