Tush.UZ - Tushlar tabiriChechenistonlik sobiq amaldor Ruslan Alisultanov fransuz oziq-ovqat ishlab chiqaruvchi Danone'ning Rossiyadagi sobiq aktivlariga egalik qiluvchi kompaniya yagona egasi bo‘ldi. Bu haqda 9 dekabr, dushanba kuni «Interfaks» agentligi Rossiya Federatsiyasi davlat reyestriga tayanib xabar berdi.
Chechenistonlik yosh millioner
Hozir Alisultanov 32 yoshda. 2018 yilda, 26 yoshida u Grozniy meri o‘rinbosari, keyinroq — Checheniston qishloq xo‘jaligi vaziri o‘rinbosari bo‘ldi. Hozir u - «Yunimilk» kompaniyasining (sobiq «Vamin-Tatarstan») yagona egasi. Bu Rossiyadagi eng yirik pishloq va sariyog‘ ishlab chiqaruvchilardan biri. Aynan unga avvalroq Danone'ning Rossiyadagi aktivlari o‘tgan. Ular Health & Nutrition firmasiga birlashtirildi.
Danone kompaniyasining Rossiyadagi aktivlari «Vamin R»ga sotilgani 2024 yil may oyida ma’lum bo‘ldi. Kelishuv summasi oshkor etilmadi. Financial Times yozganidek, u 17,7 milliard rublni tashkil qilishi mumkin, bu biznesning bozor qiymatidan 56 foizga past.
«Tataristonlik Mask»
Bitim amalga oshirilgan vaqtda «Vamin R»ning 99 foizi 29 yoshli tadbirkor Mintimer Mingazovning «Vamin-Tatarstan»kompaniyasiga tegishli edi. U «Yedinaya Rossiya»dan sobiq senator Vagiz Mingazovning o‘g‘lidir. «Vamin R»da faqat 1 foiz Alisultanovga tegishli bo‘lgan. Endi ikkinchisi butun «Vamin-Tatarstan»ga, shuningdek, «Vamin R» hamda Health & Nutrition'da 100 foizga egalik qilyapti. Kelishuv sabablari, tafsilotlari va qiymati noma’lum.
Qozonning «Biznes Online» portali kompaniya sotib olingani haqida birinchi bo‘lib xabar berdi. U Mingazovni «tataristonlik Mask» va «fransuzlar aktivlarini chechenlarga topshirgan» «Vamin sut imperiyasining vorisi» deb atagan.