Latifalar

Bir qiz sevib qolib, shirin hayollar og‘ushida osmonga qarab ketayotsa, katta xarsang toshga urilib, yiqilib tushibdi. Ancha vaqt o‘tsa ham o‘rnidan turmasmish.
Buni kuzatib turgan bola yoniga kelsa, qiz osmonga qarab, bemalol yotganmish.
Shunda bola:
— Ey singlim, qattiq yiqilmadingizmi? Keling qo‘lingizni bering, - desa, qiz:
— E bor-ye, shirin hayolimni ham beliga tepding, - dermish.

Jinnixonada bemorlar televizordan yangiliklarni ko‘rib o‘tirishsa, bir bemor:
— Yaxshi-yam jinnixonada yotgan ekanman..., - desa, ikkita vrach unga qarab:
— Sog‘aya boshlaganga o‘xshaydi, - dermish.

Yangi mashina olgan bir ayol avtoservisga borib ustaga:
— Yangi mashina olgandim, hech o‘t olmayapti. Iltimos, bir ko‘rib qo‘ysangiz, - debdi.
Mashinani ko‘zdan kechirib bo‘lgach, ayolga:
— Mashinangizni tuzatish uchun ancha ishlashimiz kerak. Bir necha qismlarini almashtirishimiz kerak. 300 ming berasiz, bir haftada tayyor bo‘ladi, - debdi usta.
— Bir kunda tuzatishni iloji yo‘qmi? - so‘rabdi ayol yolvorib.
— Bir kunda tuzatsak 500 ming bo‘ladi, - degan ekan, ayol pulni berib, — Ertaga kelaman, - deb ketibdi.
Shunda shogirdi ustaga:
— Nima qilish kerak buni, - desa, usta:
— Benzin quyib qo‘y! - dermish.

Qishda yaxmalak zinalardan tushaverishda oliyjanob, madaniyatli erkaklarni deyarli topib bo‘lmaydi.

— Bemor nimadan vafot etdi?
— Muhabbatdan!
— Shunchalik sevarmidi? Kimni?
— U aroqni jonidan ortiq ko‘rardi!

Yapon va o‘zbek garov o‘ynashibdi. Kim uzoqroq umr ko‘rishini bilmoqchi bo‘lishibdi.
O‘zbek Yaponiyaga borib qarasa, 103 yoshli qariya o‘tirgan ekan.
Keyin yapon O‘zbekistonga kelibdi. Bir payt qarasa, tog‘dan 102 yoshli qari o‘zbek otaxon yugurib tushib kelayotganmish.
— Nima bo‘ldi? - deb so‘rashsa: o‘zbek otaxon:
— Otamdan qochib kelyapman. Bobomni xassasini berkitib qo‘ygandim, - dermish.

Onasi qo‘lida kichkina bolakayni ko‘tarib ketayotsa, haligi bola hadeb o‘tgan-ketganlarga, — Jo‘na, yo‘qol, bor ket! - deb baqiraverarkan.
Bir kishi:
— Hoy bola, o‘zi kichkina bo‘lsang, yurishni ham bilmasang... Namuncha yomon so‘zlarni gapiraverasan?! Bas qil! - debdi.
Bolakay:
— Siz-chi, yurishni bilasizmi? - desa, kishi:
— Ha, bilaman, - debdi.
— Unaqada jo‘na, yo‘qol, bor ket! - dermish yana bolakay...

Bir ayol ijtimoiy ta’minot bo‘limiga 15 ta bolasini yetaklab, kirib kelibdi.
— Oho! – hayratlandi xizmatchi. — Bularning hammasi o‘zingiznikimi?
— Ha, hammasi o‘zimniki, - javob beradi ona.
— O‘tir, Eshmat, — desa, hamma bolalar o‘tiribdi.
— Xo‘sh, - debdi xizmatchi, — sizlarni ro‘yxatga olishim kerak. Menga bolalaringizni ismlarini aytsangiz.
— Hammasi oddiy, — javob beribdi ona. — O‘g‘il bolalarning ismi Eshmat, qizlarniki esa Anzirat.
Quloqlariga ishonmagan xizmatchi yana savol beribdi:
— Jiddiy aytyapsizmi? Ularning hammasi Eshmat bilan Anziratmi?
— Ha, bu hayotimni ancha yengillashtiradi. Ertalab ularni bitta qilib chaqiraman, hammasi uyg‘onishadi. Tushlik vaqtida ham “Eshmat!”, “Anzirat!” deyman, ular kelishadi. Qachon ularga tanbeh bersam, baqir-chaqirni to‘xtatadi. Menimcha, bu eng zo‘r g‘oya!
Ijtimoiy yordam xizmatchisi yana savol beradi:
— Agarda hammasini emas, faqatgina bitta bolani chaqirmoqchi bo‘lsangiz nima qilasiz?
— Undami, ularni faqat familiyasi bo‘yicha chaqiraman.

Fizika o‘qituvchisi Azizga yer shari qanday aylanishini tushuntirib beribdi.
Aroqxo‘r qo‘shnisi Toshpo‘lat aka esa Azizga yer nima uchun aylanishini gapirib beribdi.

— Azizim, menga nisbatan biror tuyg‘u his qilasizmi?
— Ha, albatta!
— Unda nega qo‘limni so‘ramayapsiz?
— Rahm-shavqat tuyg‘usi bilan turmush qurib bo‘lmaydi-da...

Bitta odam qo‘shnisini hovlisiga kirib, tovuqxonasidan tuxum o‘g‘irlabdi.
Tuxumni ushlab turib, hayol sura ketibdi:
"Shu tuxumdan jo‘ja ochirib, boqib katta tovuq qilaman. Tovuqni sotib, g‘oz olaman, g‘ozni ham boqib, sotib, qo‘y olaman. Qo‘yni semirtirib, sotib, buzoq olaman! Buzoqni katta buqa qilib, uni ham sotib, mashina olaman!", deb hayol surib tursa, qo‘shnisi kelib qolibdi.
O‘g‘rini ko‘rib:
— Tuxumni joyiga qo‘y! - deb baqirgan ekan, tuxum qo‘lidan tushib, sinib ketibdi. Shunda haligi o‘g‘ri odam:
— Mashinamni to‘lab berasan! - deb baqira ketgan ekan.

Bir ayolni eri jag‘ini sindirib, gipsda kasalxonada yotgan ekan. Ko‘rgani kelgan xotini unga:
— Mana azizim, sizga sabzi, turp, olma, rediska olib keldim. Yeb yoting! Keyingi safar nima olib kelay? - desa,
eri gipslangan og‘zi bilan zo‘rg‘a:
— Yong‘oq olib kel! Chaqib yotaman, - dermish.

Ishdan qaytgan er xotinidan so‘rayapti:
— Bugun nimalar qilding?
Xotin:
— Kir yuvdim, ovqat pishirdim, derazalarni yuvdim, uylarni tozaladim. Mana kiyimlarni dazmollab o‘tiribman. Agar ertaga internetga pul to‘lab kelmasangiz, uyga kiritmayman!!!

Eng puxta reja:
"Bir gap bo‘lar! Borganda, joyida hal qilarmiz!"

Bir odam do‘stinikiga mehmonga kelibdi. Do‘stini xotini dasturxon tuzab, ovqat olib kiribdi. Mehmon sinkovroq ekan, do‘stidan so‘rabdi:
— Do‘stim, bu xotiningni qulog‘idagi zirakni qayerdan olding. Umrim bino bo‘lib, bunaqasini ko‘rmaganman.
— E-e, u zirak emas. Tug‘ilgan kuniga sovg‘a olay desam, hali oylikkacha ancha bor ekan. Kastyumimni tugmasini uzib olib, qulog‘iga qadab qo‘yganman...

— Do‘stim, sigirlar o‘tlaydigan o‘tloqni bilasanmi?
— Ha, yam-yashil, keng dala!
— Qo‘ylar yashaydigan qo‘rani-chi, bilasanmi?
— Ha, atrofi taxta bilan o‘ralgan...
— Italiyani xaritadagi ko‘rinishi qandayligini bilasanmi?
— Yo‘q. Nimaga mendan bularni so‘rayapsan?
— Shunchaki, geografiyadan ko‘ra, sigir, qo‘ylarni yaxshiroq tushunishingni isbotlab bermoqchi edim.

Bir ofitsiant vrach yoniga kelib, shikoyat qilibdi:
— Doktor, tunlari tushimga ish vaqtim kiradi. Menga xo‘randalar ovqatlanib bo‘lgach, choy puli uzatishsa, men pullarni olmasdan, qo‘lim bilan itarib tashlayman, - debdi.
Vrach:
— Sizga qanday yordam berishim mumkin?! Tinchlantiradigan dori yozaymi?
— Yo‘q doktor, qo‘llarimni sindirib tashlang!

Bir kuni o‘rmon hayvonlari armiyaga bormoqchi bo‘lishibdi.
Tibbiy ko‘rikdan o‘tish uchun birinchi bo‘lib quyon kiribdi. Hafa bo‘lib qaytib chiqibdi.
Ayiq so‘rabdi:
— Nima bo‘ldi quyonvoy?
Quyon:
— Olishmadi. Oldimdagi ikkita tishim uzun ekan... Kel ayiqvoy, seni oldingdagi ikkita tishingni sug‘urib tashlaymiz. Seni armiyaga olishadi.
Ayiq tishlarini sug‘urib, ko‘rikka kirib ketibdi. Birozdan so‘ng "Qani quyon?" deb baqirib chiqibdi.
Hayvonlar:
— Ha nima bo‘ldi? - deyishsa, ayiq:
— Meni oyoqlarim qiyshiq ekan. Tishlarim emas, - degan ekan.

"Hamma erkaklar bir xil" degan gapni xitoylik ayol o‘ylab topgani aniq!
Chunki u ayol olomon ichida erini yo‘qotib qo‘ygan edi-da...

Bolakay televizor ko‘rib o‘tirgan adasini yoniga kelib:
— Ada nima ko‘ryapsiz?
— Yengil atletika bo‘yicha yugurish musobaqasini o‘g‘lim. Hozir hammasi yuguradi, bittasi g‘olib bo‘ladi. Ana shu bitta sportchiga sovrinni berishadi.
— Unday bo‘lsa qolganlari nega yugurishyapti ada???

<< < 92 93 94 95 96 97 98 > >>

Jami 2090 ta latifa mavjud

Tavsiya qilamiz

Bosh sahifa