Qo'nganida omad qushim,  
Dunyoni tor qilma falak,
G'am egmasin manim boshim,  
Qayg'uga yor etma falak.
Oqizmagin ko'zda yoshim,  
Yo'llarim qor etma falak.
Do'stlarga zor qilma falak,
Dushmanga xor qilma falak!

Taqdir derlar bilib bo'lmas,
Yaxshi kun bor, yomon kun bor.  
Ertasini hech kim bilmas,
Dard chekmagan ayting kim bor.
Karvonda ot yolg'iz bo'lmas,  
Oqsamasin yo'lda tulpor.
Do'stlarga zor qilma falak,
Dushmanga xor qilma falak.

Bir kun gullab, bir kun xasta,
So'lmog'ingni unutma hech.
Bir kun baland, bir kun pastda,
Bo'lmog'ingni unutma hech.  
Davring kelsa, tildan asta,
Qolmog'ingni unutma hech.
Do'stlarga zor qilma falak,  
Dushmanga xor qilma falak.

Firibgarga ishonmagin,  
Otasin ham aldab ketar.  
So'zlariga quvonmagin,
Dasturxoning bosib o'tar,
Halol mehnatdan qolmagin,
Yo'lingda to'ldirmay xatar.
Do'stlarga zor qilma falak,
Dushmanga xor qilma falak.

Sotqin do'stlar jabridan kim,  
Yondi bag'r, kuydi yurak.  
Nahot arzon bo'ldi qadrim,  
Nahot yig'lar, dil jonsarak,
Ko'p o'ylama Ahad Qayum,
Nega buncha joning halak.  
Do'stlarga zor qilma falak,  
Dushmanga xor qilma falak.