TO‘YDAN KEYIN

Qo‘shiq aytsang yarashadi kuydan keyin,
Dono odam o‘y suradi o‘ydan keyin,
Niyat qilar uyda bola tug‘ilganda,
O‘zbek yana to‘y boshlaydi, to‘ydan keyin.

Ko‘rsam deydi farzandining baxtlarini,
Qursam deydi tole’idan taxtlarini,
O‘zgartirmay ming yillik odatlarini,
O‘zbek yana to‘y boshlaydi, to‘ydan keyin.

Bunday kunda qashimas hech boshlarini,
Hisoblamas yaxshi kunda xarjlarini,
Sanamayin to‘kilgan oq sochlarini,
O‘zbek yana to‘y boshlaydi, to‘ydan keyin.

Sabr qilar og‘ir-engil kunlar ko‘rib,
Pishib ketgan har bir dardni yengaverib,
Har qandayin g‘am-tashvishni chetga surib,
O‘zbek tag‘in to‘y boshlaydi, to‘ydan keyin.

Ba’zilar bor sherdan olib filga berar,
Salom bersang aligini pulga berar,
Unga qarang topganini elga berar,
O‘zbek yana to‘y boshlaydi, to‘ydan keyin.

Ko‘ngil uyi obod bo‘lar so‘zlar bilan,
Yaxshi-yomon kunda bo‘ling do‘stlar bilan,
Qo‘l bersangiz Ahad shoir sizlar bilan,
O‘zbek yana to‘y boshlaydi to‘ydan keyin.