BUXOROCHA MUHABBAT

Bizning yurtda yoshlar asli sho‘x bo‘ladi,
Qizlarining ko‘zi tundek tim bo‘ladi,
Buxoroda sevgi sharti boshqachadir,
Buxorocha muhabbatni kim biladi.

Uylanadi yigit qizni ko‘rmay turib,
Qiz ham ko‘nar qallig‘ini bilmay turib,
O‘z baxtiga ishonadi sevmay turib,
Buxorocha muhabbatni kim biladi.

Siz so‘rarsiz qalamqoshlar narxi qancha,
Azim shahar bo‘yi baland ancha- muncha,
Kelinni siz ko‘rolmaysiz to‘y o‘tguncha,
Buxorocha muhabbatni kim biladi.

Oilalar bir birini bilsa bo‘ldi,
To‘ydan keyin birga baxtli bo‘lsa bo‘ldi,
O‘n-o‘n besh yil o‘tib, keyin sevsa bo‘ldi,
Buxorocha muhabbatni kim biladi.

Kim biladi Shofirkoncha odatlarni,
G‘ijduvoncha ulfatlarni, ovqatlarni,
To‘y kechasi sinashadi omadlarin,
Buxorocha muhabbatni kim biladi.