Bu o'g'il meniki emas aslida,
Garchand eng so'nggi dam ko'zlarim yopar.
Men uni topgandim ishqim faslida,
Ishq faslida u ham o'zgani topar.

Bu qiz ham birovga ketadigan gul,
Ushlab qololmagay na zar, na tillo.
Mendan-da mehribon kimsa bo'lar ul,
Mendan-da vafodor chiqar ul illo.

Bu she'rmi, she'rni ham o'zgalar oldi,
Rashku gumondan goh ranglarim somon,
She'rku bu, boshimga ming g'avg'o soldi,
Kelib - kelolmayman o'zimga hamon.

Voajab, bul qadar yolg'izlik nega,
G'aroyib bu hayot - biz o'tar yo'lak.
Hech kim, hech narsaga men bo'lmam ega,
Sevgilim, Sizga o'z ishqimdan bo'lak.
Do'stlarizga ulashing: