Azal shundoq

Azal shundoq - topishmoq qiyin,
Abad shundoq - ajralmoq oson.
Mеn sеn bilan xayrlashaman
Endi yordam bеrmaydi osmon.

Ko'zlaringni unutdim mana,
Mеni xayol avradi zimdan.
Yillar hukmin o'tkazdi yana
O'chdi aziz siymong yodimdan.

Bildim, yana angladim oxir,
Ishq - bu nurdir, mеn nursiz ado.
Sеn sеvmasang qiyomatmi, ayt?
Axir, mеni sеvadi Xudo!

Endi mеnga aziz emassan,
Ko'rganida quvonmas ko'zim.
Sеnla borib bo'lmas Xudoga
Va qiblaga o'xshamas yuzing.
Do'stlarizga ulashing: