[IMG]
men.png
Torn tez-tez safarlarga chiqqan bo'lsada, Isroilga hech qachon kelmagandi. Uning bu mamlakat haqidagi bilimlari gazetalardagi yangiliklardan va yaqindagina Injilda o'qiganlaridan iborat edi. U Isroilning zamonaviy, ilg'or davlat ekanligidan ajablandi. Fir'avnlar davrida ham mavjud bo'lgan, lekin yaqindagina, asfalt va betonlar davrida qaytadan paydo bo'lgan bu davlat sahroning o'rtasiga tushib qolgan qumsuvoq parchasiga o'xshardi. Uning osmoni bir paytlar yahudiylarning Misrdan qochishlariga shohid bo'lgandi; hozir esa osmono'par binolar va mehmonxonalar ko'kka qadar bo'y cho'zgandi.
Butun atrofni qurilishlar shovqini tutib ketgandi. Ulkan yuk ko'tarish kranlari xuddi fil singari o'z "xartum"larida yuklarni u yoqdan bu yoqqa olishardi. Shahar xuddi har tomonga kengayish uchun urinayotganday edi. Ko'p yerlarda asfalt bo'linib ketgan, yaqinda qurilgan, ammo eskirib ketgan yo'llar qaytadan qurilayotgandi. Hamma yoqqa Muqaddas Yer bo'ylab sayohat qiluvchilar e'tiborini tortuvchi e'lonlar osib tashlangandi. Politsiyaning ham ishi boshidan oshib yotardi: ular qo'poruvchilarni topish maqsadida chamadon va xaltalarni tekshirib chiqishardi.
Torn va Jenningsni aeroportda uzoq ushlab qolishdi: ularning jarohatlari va ko'kargan yuzlari shubha uyg'otgandi. Torn Amerika ma'muriyatidan ekanligini yashirish maqsadida fuqarolik pasportini ko'rsatdi.
Ular taksida Xilton mehmonxonasigacha borishdi, so'ngra do'kondan yupqa kostyumlardan sotib olishdi. Issiq kuchayib borardi. Tornning jarohatiga oqib tushgan ter yarasini achishtirardi. Jennings buni sezib, Tornga shifokorga borishni taklif qildi. Ammo Torn Bugengagenni topish ishtiyoqida yonardi.

Torn va Jennings bozor tomon yurishdi va hammadan Bugengagen haqida so'ray boshlashdi. Bu ismni hech kim eshitmagandi va ular qidiruvni davom ettirishdi. Torn umidsizlikka tushgan, oyog'ini arang sudrardi. Jennings esa aksincha, juda tetik bo'lib, do'konlar, fabrikalarga kirib chiqar, telefon kitoblarini tekshirardi, u hatto bir marta politsiya bo'limiga ham kirib chiqdi.
- Balki u ism-sharifini o'zgartirgandir, - dedi Jennings uf tortib ertasiga ertalab ular parkda o'tirishganida. - Ehtimol, endi uning ismi Jorj Bugendir. Yoki Jim Gagen. Yoki Izzi Gagenberg.
Ertasiga ular Quddusdagi kichikroq mehmonxonalardan biriga joylashishdi. Ular o'sha g'alati ismni hech bo'lmasa eshitgan odamni izlab kun bo'yi tentirashdi. Ammo samarasi bo'lmadi.
- Yengilganga o'xshaymiz, - dedi Jennings mehmonxona ayvonidan pastga qararkan.
Xona isib ketgan, Torn terga botganicha karavotda yotardi.
- Agar bu yerda bittayu bitta Bugengagen bo'lsa, uni topish uchun birorta ham imkoniyatimiz yo'q. Biz esa uning umuman mavjud emasligini ko'rib turibmiz.
U xonadan sigaret qidira boshladi.
- Jin ursin, o'sha kichkina ruhoniy doim morfiy iste'mol qilib yurgan, biz esa uning so'ziga laqqa tushibmiz. Yaxshiyamki, u senga Oyga uchishing lozimligini aytmapti.
U karavotga o'tirdi va Tornga qaradi.

- Tushunolmayapman, Torn. Bir necha kun ilgari men qidiruvlarimizning naqadar zarurligiga ishonardim, hozir esa bu narsa menga bema'nilikdek tuyulyapti.
Torn bosh irg'adi va oyoriqdan yuzlari tirishib karavotga o'tirdi. U bintni yechdi va Jennings uning ochilib qolgan yarasini ko'rdi.
- Yarang menga yoqmayapti.
- Hammasi joyida.
- Yiring boylayapti shekilli.
- Hechqisi yo'q, - dedi Torn.
- Nima uchun senga shifokor topishimni so'ramayapsan?
- Yaxshisi, qariyani top, - dedi Torn. - Menga kerakli bo'lgan yagona odam u.
Jennings Tornga endigina javob berishga tutingandi, ammo eshik taqillab qoldi. U eshikni ochib, ostonada tilanchini ko'rdi. U pastak bo'yli arab bo'lib, beligacha yalang'och edi. Arab tilla tishlarini ko'rsatib tirjaydi va boshi yerga tekkuday engashdi.
- Nima kerak? - so'radi Jennings.
- Qariyani sizlar izlayapsizlarmi?
Jennings va Torn bir-birlariga qarashdi.
- Qaysi qariyani? - so'radi Jennings ehtiyotkorlik bilan.
- Bozorda menga sizlar qariyani izlayotganingizni aytishdi.
- Ha, biz bir kishini izlayapmiz.
- Men sizlarni uning oldiga boshlab boraman.
Torn o'rnidan zo'rg'a turdi va Jenningsga ma'noli boqdi.

- Tezroq-tezroq, - ularni undadi arab. - U sizlar ayni paytida kelganingizni aytdi.
Ular Quddusning tor ko'chalari bo'ylab piyoda ketishardi. Tez va jimgina qadam tashlashardi. Arab ularga yo'l ko'rsatardi. U yoshiga nisbatan juda chaqqon edi. Torn va Jennings uni ko'zdan qochirmaslikka harakat qilishar, ammo u burilishlarda ko'zdan g'oyib bo'lib qolardi. Torn va Jennings unga halloslab yetib olishganida u tirjaydi. Chamasi, ularning safari nihoyasiga yetgandi, oldinda g'ishtli devor qad ko'targandi. Jennings va Torn "ahmoq bo'ldik" degan fikrga borishdi.
- Pastga, - dedi arab burchakdagi temir panjarani ko'tararkan.
- Bu yana nimasi? - ikkilandi Jennings.
- Tezroq-tezroq, - dedi arab.
Torn va Jennings unga itoat qilishdi. Arab ularning ortidan tushdi. Yer osti juda qorong'i edi va arab mash'ala yoqdi.
Arab ularni tobora ichkariroqqa boshlab borardi. Ular mash'alaning xira nurida toshdan qilingan zinapoyani ko'rishdi. Kanalizatsiya tizimi atrofidan o'sib chiqqan jigarrang tusdagi o'simliklar hammayoqni qoplab olgan, ularning yurishini qiyinlashtirardi. Ular sekin-asta ehtiyotkorlik bilan pastga tushishardi. Zinapoya tugagach, arab yana tezlik bilan ildamladi. Torn bilan Jennings yugurishga urinishar, ammo ular yerga yotqizilgan silliq tosh yo'lakda sirg'anib ketishardi. Arab ko'zdan yo'qoldi va uning qo'lidagi mash'ala yorug' nuqtaga o'xshab ko'rina boshladi. Ular zulmatda qolishdi va sekin oldinga yura boshlashdi. Yer osti yo'lagidan kanalizatsiya tizimi o'tgandi va Jennings birdan arxeologlar aytgan "murakkab va boshni aylantiruvchi kanallar tizimi" shu emasmikin deb o'ylanib qoldi. Mash'alaning nuqtadek yorug'i ham ko'zdan g'oyib bo'ldi va ular yolg'izliklarini his etishdi.

- Jennings, - dedi Torn og'ir-og'ir nafas olarkan.
- Shu yerdaman.
- Hech nimani ko'rmayapman...
- Bu ablah...
- Meni kutib tur.
- Yurishning foydasi yo'q, - dedi Jennings. - Biz devorga taqaldik.
Torn oldinga yurib, Jenningsning yoniga keldi. Qo'lini uzatgan edi devorga tegdi. Yo'lak tugagandi. Arab esa yo'qolib qolgandi.
- U boshqa yo'l bilan keta olmaydi, - to'ng'illadi Jennings. - Bu aniq.
U gugurt chaqdi va maqbaraga o'xshagan yer osti inshootining kichik bir qismi yorishib ketdi.
- Bu nima - suv quvurimi? - so'radi Torn.
- Bu yer zax, - dedi Jennings. - Qanaqasiga zax bo'lishi mumkin?
Gugurt o'chdi va ular yana zulmat ichida qolishdi.
- Bu yer quruq cho'l. Jin ursin, suv qaerdan kelgan?
- Chamasi, yer osti bulog'i bor... - taxmin qildi Torn. - Ketdik.
- Devorni teshib o'tamizmi?
- Orqaga qaytamiz. Bu yerdan chiqib ketish kerak.
Ular devorni paypaslaganlaricha orqaga qaytishdi. Ular zo'rg'a yurishar, har bir qadami go'yoki olis masofadek tuyulardi. Kutilmaganda Jenningsning qo'li havoda osilib qoldi: u bo'shliqni sezdi.
- Torn?
Jennings Tornning qo'lidan ushlab o'ziga tortdi. Yer osti yo'lagining burchagida qandaydir darcha bor edi. Ular bu darchani sezmay o'tib ketishgandi.
