[IMG]
men.png
Mashina o'rnidan siljidi. Ayol uning yo'liga yugurib chiqdi. Torn ayolni aylanib o'tishi mumkin edi, lekin unday qilmadi. U lablarini mahkam qimtidi va tezlikni oshirdi. Beylok xonim zarbdan uchib ketdi. Jeremi orqani ko'rsatuvchi ko'zguga qaradi. U asfaltda yotgan ayolning jasadini va o'tloqda jon talashayotgan itni ko'rdi.
Mashina katta yo'lga chiqdi. Uning yonida hamon o'ziga kelmagan bola yotardi. Torn Londonga olib boradigan shossega chiqdi. Tong otib borar, tuman tarqayotgandi. Tornning mashinasi bo'm-bo'sh shosseda yelib borardi.
Bola hushiga kela boshladi va oyoriqdan ingradi. Torn yonidagi go'dakka e'tibor bermaslik uchun butun e'tiborini yo'lga qaratdi.
- U odam bolasi emas! - dedi u tishlarini g'ijirlatib. - U odam bolasi emas!
Mashina o'qdek uchib borar, to'la o'ziga kelmagan go'dak esa ingrashda davom etardi.
Burilishda Torn rulni eplolmay qoldi va Demen o'rindiqdan ag'anab tushdi. Ular Barcha Avliyolar cherkoviga ketishardi. Cherkov ko'rina boshladi. Hushiga kelgan bola Jeremiga qo'rquv bilan tikilib turardi.
- Menga qarama... - o'tindi Torn.
- Boshim yomon tegdi... - yiyoladi go'dak.
- Menga qarama!
Bolakay ko'zini pastga tikdi. Ular cherkovga yetib kelishdi. Torn tepaga qarab osmonning birdaniga qorayib ketganligidan hayron bo'ldi. Shamol turib, yomg'ir yog'a boshladi. Torn eshikni ochdi. U Demenning yoqasidan tutdi va uni mashina ichidan tortib olmoqchi bo'ldi. Bola qichqirib Tornni tepa boshladi. Torn yana unga yopishdi va uni tashqariga sudrab olib chiqdi. Demen uning qo'lidan chiqib qocha boshladi. Torn unga yetib oldi va yerga yiqitdi. Osmonda momaqaldiroq gumburlab chaqmoq chaqdi. Demen Tornning qo'lidan qutulishga harakat qilib tipirchilay boshladi. Jeremi uni mahkam bosib oldi. Torn Demenni cherkovga olib borgunicha u Tornni tepib bordi.

Ko'chaning qarama-qarshi tomonida deraza ochilib kimdir Tornga qichqirdi, ammo Jeremi hech kimga e'tibor bermasdi. Shamol Tornning yuziga urilar, uning oyoqlari chalishib ketardi. Bola tipirchilagancha uning bo'yniga tishlarini botirdi. Torn oyoriqdan ingrab yubordi, ammo yurishdan to'xtamadi. Uzoqdan politsiya mashinasining sirenasi eshitildi. Tashqariga yugurib chiqqan bir kishi bolani qo'yib yuborishini aytib Tornga qichqirdi. Ammo Jeremi hech narsani eshitmas, u cherkovga yaqinlashib borardi. Demen Tornning yuziga chang soldi. Uning barmog'i Tornning ko'ziga kirib ketdi. Jeremi yiqilib tushdi va Demenni cherkov zinapoyasi bo'ylab sudray boshladi. Torn ostonaga yaqinlashib qolgandi.
Demen telbalarcha uning yuzini tirnar va Tornni tepardi. Jeremi bolani yiqitdi va qo'lini cho'ntagiga tiqib pichoqlarni ola boshladi. Demen yovvoyilarcha o'kirdi va uning qo'lidagi xaltani urib tushirdi. Pichoqlar sochilib ketdi. Torn ulardan birini qo'liga oldi. Politsiya mashinasi ularning oldiga kelib to'xtadi. Torn pichoqni yuqori ko'tardi.
- To'xta! - kimningdir ovozi eshitildi va yomg'ir orasidan ikki politsiyachi chiqib keldi. Ulardan biri to'pponchasini yalang'ochladi. Torn avval ularga, keyin bolaga qaradi va g'azab bilan qichqirganicha pichoqli qo'lini pastga siltadi. Bolaning chinqirig'i va to'pponcha ovozi bir vaqtda yangradi.
Atrofga sukunat cho'kdi - politsiyachilar toshdek qotib qolishgandi. Torn zinapoyada harakatsiz yotar, uning yonida bola tipirchilardi. Keyin cherkov eshiklari ochildi va ruhoniy chiqib keldi. U bu manzaraga dahshat bilan tikildi.
