[IMG]
men.png
U bir xonali uyni ijaraga oldi va uni cherkovga o'xshatib tashladi. Xonaning butun devor va derazalariga Injil sahifalarini yopishtirib chiqdi. Buning uchun unga yetmishta Injil kitobi kerak bo'ldi. Hammayoqqa xoch osib tashlangan, deraza oldidagi xochlardan biriga quyosh nuri tushmaguncha tashqariga chiqmasdi. Tanasidagi oyoriq kuchayib borar, Torn bilan birinchi uchrashuvi muvaffaqiyatsiz yakun topgandi. Endi Tassone elchini doim kuzatib yurardi. Bugun ertalabdan beri u Chelsi rayonida kambag'allarga uy qurish uchun mablag' beradigan shaxslar guruhida bo'lgan Tornni kuzatayotgan edi.
...Ushbu loyihani boshlaganimizdan baxtiyorman...- dedi Torn, yig'ilganlarga murojaat qilarkan, - ... bu jamiyatning turmush darajasini yaxshilashga bo'lgan intilishi natijasidir.
Shu so'zlarni aytib, u birinchi bo'lib belkurak bilan yerni chopdi. Akkordeonchilar ansambli musiqa chalishni boshlab yubordi va Torn panjaraning narigi tarafida ushbu marosimni tomosha qilayotganlarning qo'llarini siqish uchun yo'l oldi. U uzatilgan har bir qo'lni siqishga urinardi.
Kutilmaganda u qaltirab ketdi: kimningdir qo'li uning yoqasidan mahkam tutib, panjara tomon tortdi.
- Ertaga, - dedi Tassone qo'rqib ketgan Tornning yuziga tikilib. - Tush paytida Kyu-Gardenda uchrashamiz.
- Qo'yvoring! - dedi Torn.
- Bor -yo'g'i besh daqiqa xolos. Keyin meni qaytib ko'rmaysiz.
- Qo'lingizni oling...

- Xotiningizning hayoti xavf ostida. Agar kelmasangiz, u o'ladi.
Torn uning qo'llaridan yulqinib chiqdi va ruhoniy shu zahoti g'oyib bo'ldi.
Torn nima qilish kerakligi haqida uzoq o'yladi. U politsiyaga aytishi mumkin edi, lekin ruhoniyga nima deb ayb qo'yishni bilmadi. Uni so'roq qila boshlashadi, bu ish omma e'tiboriga tushadi. Yo'q, bu yo'l to'yori kelmaydi. Hech bo'lmaganda, hozircha. Torn ruhoniy nima demoqchi bo'layotganini tushunmadi. U bolaning tug'ilishi haqida nimadir degandi: eng dahshatli o'xshashlik shunda ediki, Torn aynan mana shu masalada sir saqlab kelayotgandi. Balki, o'rniga boshqa kishini jo'natar. U ruhoniyga pul beradi yoki uni qo'rqitib, qaytib kelmaydigan qilib qo'yadi. Ammo bunda ham kimdir uning sirini bilib qolishi mumkin edi.
U suratkash Jenningsni esladi va u izlab yurgan kishi topilganini unga xabar qilmoqchi bo'ldi. Ammo bu yo'l ham maqbul emasdi. Matbuot xodimini bunday ishga aralashtirish aqlli odamning ishi emas. Baribir u o'z dardini kimgadir aytgisi keldi. U ruhoniyning NIMAnidir aytishidan qo'rqardi.

Ertasiga ertalab Torn mashinasiga o'tirdi va Gortonga bir oz aylanib kelishini aytdi. U tushgacha ishxonasiga bormay, mashina minib yurdi. Uning miyasiga ruhoniyning talabini rad etish fikri ham keldi. Lekin Tornning o'zi ham u bilan uchrashishni istayotgandi. U ruhoniy bilan yuzma-yuz gaplashishi va uning barcha so'zlarini tinglashi shart. Ruhoniy Katerinaning hayoti xavf ostida ekanligini, agar Torn kelmasa, u o'lishini aytgandi. Katerina xavf ostida emasdi, ammo Torn juda xavotirlanar, endi ruhoniy uchun Katerina asosiy shaxslardan biriga aylandi.
Torn uchrashuv joyiga o'n ikki yarimda keldi va sabrsizlik bilan kuta boshladi.
Roppa-rosa birda Torn mashinadan tushdi va park ichiga yo'l oldi. Birov tanib qolmasligi uchun u plash va qora ko'zoynak taqib oldi, ammo bu urinishi uning hayajonini yanada kuchaytirib yubordi. Torn ruhoniyni izlay boshladi. Tassone unga orqasini o'girgancha o'rindiqlardan birida o'tirardi. Torn unga bildirmasdan qaytib ketishi ham mumkin edi, ammo buning o'rniga u oldinga yurdi va ruhoniyga yaqinlashdi.
Tassone Tornning kutilmaganda paydo bo'lganidan cho'chib ketdi. Uning yuzi burishdi, xuddi chidab bo'lmas oyoriqni his qilayotgandek peshonasi tirishdi. Ular ancha vaqt jim o'tirishdi.

- Bu yerga politsiyani boshlab kelishim kerak edi, - gap boshladi Torn.
- Ular sizga yordam berisholmaydi.
- Gapiring. Nima demoqchi edingiz?
Tassone ko'zlarini yumib-ochdi, uning qo'llari qaltirardi. U kuchli hayajon ostida edi.
- U Sionga kelganida... - pichirladi u.
- Nima?
- U Sionga kelganida. Samo kometani yo'llaydi. Va Rim yuksaladi. Biz... ziyoni qaytib ko'rmaymiz.
Tornning yuragi hapriqdi. Bu odam butunlay aqldan ozgan!
Uning qiyofasi hech nimani anglatmas, she'r o'qirdi.
- Abadiy dengiz tubidan yirtqich chiqib keladi. Va so'nggi qoni qolguncha jang qilish uchun lashkar keladi. Aka o'z ukasini o'ldiradi va qilichini oxirgi insonning yuragi urishdan to'xtamaguncha tashlamaydi.
Torn ruhoniyni kuzatib turar, ruhoniy esa qiynalib so'zlardi.
- Kashfiyotlar Kitobida bularning barchasi yozilgan! - qichqirdi u nihoyat.
- Men bu yerga diniy ma'ruza tinglagani kelganim yo'q, - dedi Torn.
- Faqat to'laligicha o'z qo'li ostida bo'lgan odam orqaligina Shayton o'zining so'nggi va dahshatli hujumini amalga oshiradi.
- Siz xotinimning xavf ostida ekanligini aytuvdingiz.

- Megiddo shahriga boring, - dedi Tassone. - Jezril shahrida qariya Bugengagenni topasiz. Faqat ugina Shaytonning o'yolini qanday qilib o'ldirish mumkinligini aytadi.
- Bilasizmi...
- Aks holda yirtqich g'ajib tashlaydi!
- Bas qiling!!!
Tassone jim bo'ldi va qaltiroq qo'llari bilan peshonasidagi terni artdi.
- Xotinimning hayoti xavf ostida ekanligini aytganingiz uchun bu yerga keldim, - dedi Torn.
- Mening ko'zimga ko'rindi, janob Torn.
- Siz aytuvdingizki...
- U homilador!
Torn jim bo'lib qoldi.
- Adashyapsiz.
- Yo'q. U rostdan ham homilador.
- Bunday bo'lishi mumkin emas.
- U bolaning tug'ilishiga yo'l qo'ymaydi. Bola onasining qornida ekanligidayoq uni o'ldiradi.
Ruhoniy oyoriqdan ingrab yubordi.
- Nimalar deyapsiz? - dedi Torn. Uning nafas olishi qiyinlashib ketgandi.
