[IMG]
men.png
9
Ruhoniyning suratini ko'rgach, Torn Londonga jo'nadi. U yo'l-yo'lakay bu voqeani o'ylab ketdi. Katerina homilador EDI, ruhoniy haq bo'lib chiqdi. Endi Torn Tassonening qolgan so'zlarini ham inkor eta olmasdi. U parkdagi uchrashuvni esladi: ismlar, Tassonening iltimosiga binoan borishi kerak bo'lgan joy nomi. U o'zini bosishga urindi, hozirgina bo'lib o'tgan voqealarni bir-bir yodga oldi: Katerina bilan suhbat, noma'lum kishining qo'ng'irog'i. "Bugungi gazetalarni o'qing", - degandi tanish ovoz, ammo Torn uning kimligini eslay olmadi. Uning ruhoniy bilan aloqadorligini kim bilardi? Suratkash! Bu uning ovozi edi! Gaber Jennings!
Ishxonasiga kelib, Torn xonani ichidan qulflab oldi. U kotibasiga Jenningsga qo'ng'iroq qilishni buyurdi. Jennings uyida yo'q edi. Kotiba unga bu haqda aytgach, Katerina ertalab qo'ng'iroq qilganligini ham aytdi. Torn unga keyinroq sim qoqmoqchi bo'ldi. Katerina u bilan abort masalasida gaplashmoqchi edi, Torn esa unga aniq javob berishga tayyor emasdi.
"U bolaning tug'ilishiga yo'l qo'ymaydi", - Torn ruhoniyning so'zlarini esladi. - "Bola onasining qornida ekanligidayoq uni o'ldiradi".
Torn Charlz Grierga qo'ng'iroq qilib, u bilan uchrashmoqchi ekanligini aytdi.

...Tornning tashrifi Grierni ajablantirmadi. Katerinaning tashvish va azoblarining cheki yo'q edi. Ayoldagi qo'rquv hissi ortib borar, shifokor u o'z joniga qasd qilishidan qo'rqardi.
- Bu qo'rquvlar qachongacha davom etishini oldindan bilish qiyin, - dedi u Tornga. - Ammo rostini aytganda, u o'ta kuchli ruhiy holatga tushishi mumkin.
Torn kursida o'tirar, yosh ruhshunos esa trubkasini tutatgancha xonaning u yog'idan bu yog'iga yurardi.
- Uning ahvoli yomonmi? - so'radi Torn qaltiroq ovozda.
- Deylik, kasallik kuchaymoqda.
- Unga yordam bera olasizmi?
- Men uni haftada ikki marta tekshiryapman, u bu yerga tez-tez kelib turishi kerak.
- Siz uni aqldan ozgan demoqchimisiz?
- U o'z xayoliy dunyosida yashaydi. Uning xayollari juda qo'rqinchli va bu xayollarning unga ta'siri kuchli.
- Qanaqa xayollar? - so'radi Torn.
Grier aytishni ham, aytmaslikni ham bilmay bir oz o'ylanib turdi. U stulga o'tirdi va Tornga tik boqdi.
- Birinchidan, u bola o'ziniki emas deb o'ylaydi.
