[IMG]
men.png

14
Devidson harbiy Akademiyasida shaxsiy qurolni topshirish marosimiga bag'ishlangan kecha bo'layotgandi.
Marosim Akademiya hovlisida o'tkazilayotgandi. Ota-onalar va boshqa kursantlar esa balkonda turishganicha eng a'lochi bolalarga mukofot topshirilishini tomosha qilishayotgandi.
Bu yil olti nafar kursant shunday mukofotga munosib topilgandi. Demen ham ular orasida edi. Mark ham mukofotga sazovor bo'lgandi va besh kursant shunday tarzda saflanishdiki, ularning safida bir kishi yo'qligi bilinib turardi.
Demen mayorurlik bilan qaddini g'oz tutganicha o'z navbatini kutib turardi. U hali ham bilagiga qora mato taqib yurardi.
Anna balkonda Buxer bilan birga turardi. U yig'lab yuboray dedi. Buni sezgan Buxer unga ro'molcha uzatdi.
Balkonning qarama-qarshi tomonida qizlar to'planib turishardi. Ularning hammasi bir xil ko'ylak kiyib olishgandi. Qizlar orasida bir sohibjamol ajralib turardi. Uning orqasida qora kostyum-shim kiygan ikki barzangi turishardi. Bir qarashdayoq ularning tansoqchilar ekanligini bilish mumkin edi. Qizning otasi, Illinoys shtati gubernatori farzandiga birov ozor yetkazishini istamasdi.

Tantanali marosim davomida qiz Demendan ko'zini uzmadi.
Ismi e'lon qilinganda Demen oldinga chiqdi. Poshnalarini bir-biriga qarsillatib urgancha mukofot beruvchining oldida g'oz qotdi.
Demen shaxsiy qurolini olgach, mukofot beruvchi unga ikkinchi xanjarni uzatdi.
- Mana buni ham ol, - dedi u qurolni topshirarkan. - Bu oramizda endilikda yo'q bo'lgan akang Markniki. U bu mukofotga loyiq edi.
Yig'ilganlar qarsak chalib yuborishdi. Anna yoshlangan ko'zlarini artdi. Gubernatorning qizi hammadan qattiqroq qarsak chalardi.
Demen ta'zim qildi va ortiga qaytdi.
Annaning yonida haydovchi Myurrey paydo bo'ldi. Myurrey uning qulog'iga nimadir deb shivirladi. Anna bosh irg'adi va Buxerga murojaat qildi:
- Men ketishim kerak, Pol. Richard qaytib kelyapti ekan. Uni aeroportda kutib olmoqchiman.
Buxer bosh silkidi.
- Kechki bazmga kelasizlarmi? - qiziqdi u.

Anna yelkasini qisdi.
- Harakat qilamiz, - dedi u va Myurreyning ortidan shoshildi.
Buxer uni kuzatib qoldi, so'ng pastga qaradi va Neffning nigohini topdi. Ular bir vaqtning o'zida bosh irg'ashdi va o'girilishdi.
Anna avtomobilning orqa o'rindig'ida o'tirardi. U Richardning kelishini sabrsizlik bilan kutayotgandi.
Samolyot deyarli avtomobil yonida to'xtadi. Motorlar o'chdi va zina tushirildi. Eshik ochilib, Richard shoshilgancha pastga tusha boshladi.
Richard Anna bilan so'rashish o'rniga Myurreyga gap qotdi:
- Demen qani? - Uning ovozi hayajondan qaltirardi.
- Akademiyada, janob, - bunday savolni kutmagan Myurrey kalovlanib qoldi.
- Biz taksida muzeyga boramiz. Siz esa hoziroq Demenni olib muzeyga boring. - Richard orqa eshikni ochib, xotinining mashinadan tushishini kutib turdi. - Ketdik, - buyurdi u, - sen men bilan borasan.
