[IMG]
men.png
Ular aerovokzal binosi tomon shoshilishdi. Anna eridan qolib ketmaslikka urinardi. U nima bo'layotganini tushunolmasdi. Myurrey ularning ortidan qarab qoldi va birdan uning ko'zlarida nafrat uchquni chaqnadi.
Bazm avjida edi. Bu yerdagi o'smirlar va qizlar xuddi qadim zamonlardan kelib qolishgandek edi. Kursantlar bayram mundirini kiyib olishgan, qizlar esa etagi yerga tekkudek ko'ylaklarda edilar.
Devor yonida raqs tushishni istamagan o'smirlar turishardi: kimdir uyalar, kimdir esa raqs tushishni bilmasdi. Bir guruh qizlar ham ularning ro'parasida turib olishgan, yigitchalar bilan ko'z urishtirishardi.
Qarshi tomondagi devor yonida Demen va Neff raqs tushayotganlarni kuzatib turishardi. Neff birdan ikki tansoqchi hamrohligida Demendan ko'zini uzmay turgan qizni ko'rib qoldi.
- Uni raqsga taklif qil, - dedi serjant Demenga.
- Gubernatorning qizini-ya? - dedi Demen.

Neff bosh silkidi.
Demen jilmaydi.
- Ularning oilasi bilan tanishman, - dedi u serjantga va qiz turgan tarafga yo'l oldi.
Neff uni kuzatib qoldi. Serjantning yuzida qoniqish ifodasi bor edi.
Richard muzeyning pastki qavatiga olib boradigan zinadan yugurib tushardi. Uning ortidan Anna yugurardi.
- Men bunga ishonmayman! - dedi u eriga yetib olishga urinarkan.
- Bunga ishonishing shart! - e'tiroz bildirdi Richard. - U Markni o'ldirdi, Axerton va Pasarianni ham u o'ldirdi.
- Bas qil! - yolvordi Anna unga yetib olib qo'lidan ushlarkan. Richard o'girildi.
- Qotilliklar davom etaveradi. U yo'liga qarshi chiqqan har bir kishini o'ldiradi. - Richard xotinining changalidan qutulib chiqdi va zina bo'ylab pastga tashlandi.
- Qanaqasiga? - baqirdi Anna. - Qanday qilib o'ldirgan? Nima, muzni yorilishga majbur qilganmi?..
- Yo'q, - eri uning so'zini bo'ldi, - u o'zi emas...

- Yoki gaz quvurini yorib yubordimi?..
Richard yarim yo'lda qotib qoldi va xotiniga qaradi.
- Boshqalar ham bor, - dedi u. - Uning atrofidagilar.
- Richard, - dedi Anna o'zini xotirjam ko'rsatishga urinarkan, - nima deyayotganingni o'ylab ko'r! Bu bema'nilik-ku! Qanaqa "boshqalar"? Shaytonlarmi? Shaytonlar maxfiy tashkilotimi? Richard, iltimos!
Richard uning qo'lidan ushladi.
- Anna, - dedi u yolvorgannamo, - men Charlzning qanday halok bo'lganini ko'rdim...
Annaning nafasi bo'g'ziga tiqilib qoldi. U Uorrenning o'lganini endi eshitayotgandi.
- Igael devorida Demenning yuzini ko'rdim!
Oraga uzoq jimlik cho'kdi.
Richard va Anna bir-birlariga qarab qotib turishardi: bu dahshatli kurashdagi ikki raqib. Richard faqat bir narsani istardi: Annaning unga ishonishini. Anna esa bularning hammasi hazil bo'lib chiqishini xohlardi. Mayli, dahshatli bo'lsa-da, hazil bo'lib chiqishini.
- Nima qilmoqchisan? - so'radi u.

Demen gubernatorning qizi bilan raqs tushardi. Bolalar ularni kuzatib turishar, aksariyat qizlarda esa rashk hissi uyg'ongandi.
Raqs tushayotib, Demen zal burchagida Neff bilan Myurrey turishganini ko'rdi. Ular nima haqdadir jiddiy suhbatlashishardi. Haydovchi Demenning nigohini sezdi.
- Kechirasiz, - dedi Demen qizga, - men tezda qaytaman. - U gubernatorning qizini tansoqchilar yoniga kuzatib qo'ydi va Myurrey bilan Neffning oldiga yo'l oldi. Demen ularga yaqinlashganida Neff u tomon qadam tashladi va dedi:
- Ehtiyot bo'ling!
Demen unga sovuq nazar tashladi va dona-dona qilib dedi:
- Kimligimni unutib qo'yibsiz.
Neff xuddi uzr so'ragandek boshini egdi.
Demen o'girildi va Myurreyning ortidan ergashdi. Ular avtomobil tomon yo'l olishdi.
Richard nihoyat kalitni topdi va doktor Uorrenning xonasini ochdi. U xona ichiga otilib kirib chiroqni yoqdi va nimanidir qidira boshladi: qutilarni u yoqdan bu yoqqa surdi, stollar ostiga qaradi.

- Nima qilyapsan? - dedi Anna ostonada turarkan. Richard javob qaytardi:
- Pichoqlar shu yerda. Shu yerda bo'lishi kerak.
Anna xonaga yugurib kirdi.
- Richard, yo'q! - qichqirdi u. - Unday qilma! Bunga yo'l qo'ymayman...
Richard uni itarib yubordi.
- Ket! - buyurdi u. - Pichoqlar shu yerdaligini bilaman.
Anna dahshatga tushdi.
- Uni o'ldirmoqchimisan?
Richard shkafni titkilashda davom etdi.
- U shu yerda bo'lsa...
- Yo'q!
- Anna, bu bola odam emas! - Torn qulfloyoliq qutini topdi.
- U ukangning o'g'li-ku! - Anna ho'ngrab yubordi. - Yetti yil davomida uni o'z o'g'lingdek yaxshi ko'rib kelding!
Lekin Richard uni eshitmasdi. U qutini ochishi kerak edi. U birorta asbob topish ilinjida u yoq-bu yoqqa alangladi va turli arxeologik asboblar turgan qutini ko'rib qoldi. Uning ichida bolg'a bor edi. Torn uni oldi va qutiga engashdi.
Muzey ro'parasiga avtomobil kelib to'xtadi. Undan Demen tushib keldi. U Myurreyga nimadir dedi, so'ng zina bo'ylab yuqoriga ko'tarildi.
