[IMG]
men.png 
Arxeologiyaga bo'lgan muhabbat Richardga otasidan o'tgandi va u bu sohadagi har qanday yangilikni qo'llab-quvvatlardi. Mana shunday ishlardan biri keyingi yigirma yil ichida olamshumul topilmalar aniqlangan Eykra shahri yaqinidagi qazuv ishlari edi. Bu qazuv ishlarining tashabbuskori Rejinald Torn bo'lgan bo'lsa-da, bu ishlarning samarasini ko'rish Richardga nasib etgandi.
Charlz Uorren proektorni yoqdi va Richard chiroqni o'chirdi.
- Bu topilmalarning aksariyati tayyor. Tez kunda bu yerga birinchi qismi yetib keladi.
Dastlabki suratlarda guldonlar va kichkina haykalchalar namoyish etilardi. Torn ularni tomosha qilarkan, Merion xolani unutgandek bo'ldi. Anna eriga qarab kulimsiradi. Birdan u ekranga nazarini qaratdi va nafasi tiqilib qoldi. Suratda sanoqsiz bezaklar taqqan o'ta badbashara ayol aks etgandi. U yetti boshli Maxluqning ustida o'tirardi. Har bir bosh uzun bo'yinga yopishgan bo'lib, peshonalardan shoxlar, og'izlardan esa tillar chiqib turardi. Ayolning boshi orqaga tashlangan, uzun sochlari tartibsiz tarzda yoyilgan, uning o'zi esa qo'lidagi oltin qadah ichidagi suyuqlikdan mastga o'xshardi.

- Ey, Xudo, - dedi Anna.
- Ha, - dedi Charlz. - uning ko'rinishi dahshatli.
- Bobillik adashgan ayolmi? - qiziqsindi Richard.
Charlz bosh silkidi. Anna eriga savolomuz qaradi.
- Sen uni taniysanmi? - so'radi u va ular kulib yuborishdi. Charlz qo'liga qalam oldi va ekran oldiga keldi.
- U Rimni ifodalaydi. Maxluqning boshidagi mana bu o'tkir shoxlar esa saltanatga ega bo'lmagan o'n nafar shohni bildiradi. Ammo Shayton kuchga to'lib kelgach, ularga hokimiyat berishni va'da qilgan.
- U nima uchun Maxluqni minib olgan? - so'radi Anna.
- Bilmayman. Ammo u uzoqqa bormaydi. Zero, kitoblarda aytilishicha, shohlar "adashgan ayolni yomon ko'rishadi va uni yorib tashlashadi va uning tanasini gulxanda kuydirishadi".
- Dahshat, - dedi Anna qaltiroq bosib. - Siz bunga ishonasizmi?
- Harqalay, men Injil ko'plab ajoyib va g'aroyib voqealardan tashkil topgan, deb hisoblayman. Biz hali ularning ko'piga izoh topishimiz kerak.
- Masalan? - qiziqdi Anna.

Charlz duch kelgan odamni o'z e'tiqodiga kiritishga urinadiganlardan emasdi. Ammo u javobdan qochmaslikka qaror qildi va Annaga aniq-ravshan qilib tushuntirdi.
- Masalan, qiyomat yaqinligiga ko'plab dalillar bor.
- Nima? - tushunmadi Anna. U olim hazillashyapti, deb o'ylayotgandi.
- Keyingi o'n yil davomida yuz bergan ko'p voqealar ilgarigi kitoblarda aytilgan. Zilzilalar, suv toshqinlari, ochlik, tutunlardan qoraygan osmon, zaharlangan suvlar, o'zgarib borayotgan iqlim.
- Bunday hodisalar hamma davrda ham yuz bergan, - e'tiroz bildirdi Anna.
- Bundan ham qiziqarli dalillar bor. Masalan, Injil barcha tillarga tarjima qilib bo'lingandan so'ng qiyomat yuz beradi, degan bashorat bor. Taxmin qilishlaricha, qiyomat O'rta Sharqdan boshlanadi.
- Ammo... - boshladi Anna, lekin Richard gapga aralashdi:
- Suratlarga qaytsak qarshi emasmisizlar? Agar qiyomatga yaqin qolgan bo'lsa, men shuncha pulni nimaga sarflaganimni bilmoqchiman.

Ular kulishdi. Charlz masofadan boshqaruv tugmachasini bosdi. Navbatdagi suratda ham adashgan ayol ifodalangandi. Ammo uzoqroqdan suratga olingandi. Surat yonida bir ayol turardi. Uning bo'yi va rasmni solishtirib, adashgan ayolning qanday kattalikda ekanligini bilish mumkin edi.
- Bu qiz kim? - qiziqdi Richard.
- Hm, uni ham taniysan, deb o'ylovdim, - dedi Anna.
- U mening do'stim, muxbir Joan Xart. U haqda eshitganmisiz? Xart arxeolog Bugengagenning tarjimai holini yozyapti.
Navbatdagi suratda Joan Xart yaqin masofada edi. U ko'zlaridan nur yog'ilib turgan mallasoch ayol edi.
- Nima balo, uning qarmog'iga ilindingmi, Charlz? - gap qotdi Anna.
Charlz inkor ma'nosida bosh chayqab kulimsiradi.
- U o'z ishini zo'r bajaradi. Darvoqe, u Chikagoga kelmoqchi. Tez kunda bu yerda bo'ladi. U sendan intervyu olmoqchi, Richard.
- Mendan? - hayron bo'ldi Richard. - Qiziq, nima uchun?
- Qazuv ishlari, ko'rgazma. Umuman, shu to'g'rida.
- Intervyularga toqatim yo'qligini bilasan-ku, Charlz.

- Bilaman. Lekin o'ylovdimki...
- Unga aytib qo'y.
- Bo'pti, bo'pti, - Charlz bosh irg'adi. Richard oilasi xotirjamligini qanchalik qadrlashini u yaxshi bilardi.
Bir ozdan so'ng ular xayrlashishdi.
- Ertaga shaharga boraman, - dedi Richard Charlzning palto kiyishiga yordamlasharkan. - Anna esa bu yerda qoladi va hamma yoqning mahkam berkitilishini nazorat qiladi.
Charlz bosh silkidi.
- Yoz juda ajoyib bo'ldi, - dedi u va Annaning qo'lini o'pdi.
- Indinga ko'rishamiz, - dedi Anna.
Richard Charlzni mashinagacha kuzatib qo'ydi.
- Merion xola bilan... - so'z boshladi u.
- Bo'ldi, bo'ldi, men hammasini unutdim, - jilmaydi Charlz.
Richard mashina eshigini yopdi va Uorrenga qo'l silkidi. So'ngra Torn sovuq havodan to'yib nafas oldi va uyiga qaytdi.
Merion xola ular xayrlashishayotgan paytda aytilgan har bir so'zni, shuningdek Richardning bugungi voqea uchun uzr so'raganini ham eshitdi. Odatda, uxlashdan oldin kampir derazani ochib qo'yardi.
