[IMG]
men.png
Akademiyadan oltmish mil narida, Chikagoning qoq markazida Richard Torn baland imorat - "Torn Indastriz"ning bosh idorasi ayvonida qadam tashlardi. Uning yonida kompaniya prezidenti Bill Axerton ham bor edi. Zalda yana bir necha kishi bor edi: ishga juda erta kelganlar hamda tungi navbatchilikni topshirganlar.
Oqko'ngil va unchalik ko'zga tashlanmaydigan Axertondan shubhasiz, juda zo'r josus chiqishi mumkin edi. U oltmish to'rtga kirayotgandi va hayotda asta-sekinlik bilan, lekin ortiqcha zo'riqishlarsiz, ishonch bilan ko'zlagan maqsadi sari siljib borardi.
Kollejni bitirgach, Axerton "Torn Indastriz" kompaniyasining rivojlanish va rejalashtirish bo'limiga ishga kelgandi. U ishda o'zini ko'rsatgan va direktorlar kengashi raisi bo'lgan Richard Torndan keyin ikkinchi shaxs hisoblanardi.
Axerton hali ham to'yidan keyin sotib olgan uyida yashardi. U xotinini qattiq sevar, u uning ilk va yagona ayoli edi. Hayot Bill Axerton uchun kutilmagan sovg'alar in'om etmagandi va u do'stlari taqdiridagi parvozu inqirozlarni hayrat bilan kuzatardi.
Ehtimol, Axerton o'ta muloyimdir, lekin ahmoq emasdi. Ha, aqlsiz bo'lganida "Torn Indastriz"ning prezidenti bo'la olarmidi? Prezidentga ancha vaqtdan buyon bir fikr tinchlik bermasdi. Bu Axertonga bevosita bo'ysunuvchi shaxs - maxsus loyihalash bo'limi direktori Pol Buxer bilan bog'liq edi.

Axertondan deyarli o'ttiz yashar kichik bo'lgan Buxer kompaniya prezidentligiga ko'z tikayotganligini yashirmasdi. Lekin Axertonni tashvishga solayotgan kuch bu emasdi. Prezident o'z o'rnini mustahkam egallagan, o'z vazifasini juda yaxshi ado etar va do'sti Richard Torn hech qanday fitnalarga uchmasligini tushunardi. Axerton Buxerni qanchalik yaqinroqdan o'rgangani sari undagi qahri qattiqlik va qat'iyatsizlik tashvishga solardi. O'rinbosari tomonidan o'tkazilayotgan choralar ertami-kechmi kompaniyaning mavqeiga putur yetkazishi mumkin edi. Va kelajakda vakolatlari yanada kengayishi mumkinligi hisobga olinsa, "Torn Indastriz"ga hozirgidan ham ko'ra jiddiy xavf tug'ilishi mumkin edi.
Bularning hammasi Richard bilan zalni kesib o'tayotgan Axertonning xayolidan o'tdi. Ular "Torn Indastriz" kompaniyasiga qishloq xo'jalik zavodini sotib olish taklifi bilan chiqqan Buxer bilan uchrashishlari va korxonani ko'zdan kechirishlari lozim edi.
Ular zavodga borishlaridan ilgariroq Tornni o'z xavotiridan ogoh qilish uchun Axerton bugun ishga erta kelgandi. U keyin bemalol gaplashish imkoniyati bo'lmasligini tushunardi.
Torn har doimgidek betarafligicha qoldi.
- Pol bilan ishlash qiyinligini tan olaman, - dedi u fikrini bayon etib, - ammo uningdek malakali odamni topish uchun uch yil vaqtimiz ketdi.

- Men uning malakasini muhokama qilmoqchi emasman, - e'tiroz bildirdi Axerton, - men...
- Uning uslubini aytmoqchisan, - uning so'zini yakunladi Torn o'zlarini kutayotgan avtomobil yoniga yetib kelishganida.
Axerton inkor ma'nosida bosh chayqadi:
- Uning uslubi bilan kelisha olaman. Har kuni har xil odamlar bilan uchrashaman. Gap bunda emas. Menga u taklif qilayotgan narsa yoqmayapti. Uning takliflaridan to'ydim.
Myurrey limuzin eshigini ochdi.
- Kel, uning o'zidan eshitib ko'ramiz, - taklif qildi Torn, ular avtomobilning orqa o'rindig'iga qulay joylashib olishgach. - o'z fikrlaringni odatdagidan sal boshqacha... yumshoqroq tarzda ifodalasang yaxshi bo'lardi.
Axertonning tomoq qirishidan so'ng Myurrey eshikni yopdi.
Bredli vzvodining kursantlari navbat bilan yangi komandirning xonasiga kirib-chiqishardi. Ular yo'lakda sabrsizlik bilan navbat kutishardi. Teddi zerikib ketib devorga suyandi. U o'z qig'fasiga shunday tus bergandiki, kursantlar oldida ikki marta yerga urgan Neffdan Teddining qo'rqayotganligi hech kimning xayoliga kelmasdi.

Aslida Teddi qo'rqayotgandi. Va endi yangi serjantga qanday muomala qilish kerakligini o'ylayotgandi.
Odatdagidek Teddining atrofiga ikki-uchta laganbardor to'plangan, ular ham ma'nisiz qig'fada turishardi. Zerikishni yo'qotish maqsadida Teddi kichkinagina tomosha ko'rsatmoqchi bo'ldi. U qirqqa yaqin fotosurat osilgan devor yoniga keldi. Bu suratlarda Akademiyaning barcha futbol jamoalari davriy ravishda aks etgandi. Suratlardan bu yerda turli davrlarda kimlar o'qiganligini bilib olish mumkin edi.
Teddi nihoyat izlagan narsasini topdi:
- Bobom mana bu jamoada o'ynagan. Mana u, - dedi semiz barmog'i bilan suratlardan biriga ishora qilib. Bir necha o'smir suratni ko'rish uchun barzangining yoniga kelishdi. - U oldingi safda o'ynagan, - davom etdi Teddi, so'ng Demenga yuzlandi.
- Jeremi Torn o'ng qanot himoyachisi bo'lgan ekan, - Teddining ovozida ochiq nafrat sezildi. - Menimcha, sen ham istagan narsangni sotib oladigan holatda bo'lsang kerak?
Demen suyanib turgan devordan o'zini oldi:
- Teddi, - do'q urdi u.

Barzangi voqeaning rivojini sabrsizlik bilan kutayotgan kursantlarga qaradi va ochiqchasiga masxaralashga o'tdi.
- Sen o'ng qanot himoyachisi o'rnini hali sotib olganing yo'qmi?
Atrofda kulgi ovozlari eshitildi. Demen Teddi tomon qadam tashladi, ammo shu lahzada Neffning xonasi eshigi ochildi va Mark chiqib keldi. U jiyani va Teddi orasidagi ixtilofni shu zahoti sezdi. Mark yo'talib qo'ydi va xotirjamlik bilan dedi:
- Demen, sening navbating.
Demen akasiga qaradi, so'ng Teddiga o'qraydi.
- Otamning ismini hech qachon tilingga olma. Hech qachon, - dedi u ovozidagi tahdidga o'zi ham hayron bo'larkan. Demen keskin o'girildi va eshikni yopib g'oyib bo'ldi. Teddi Markka qaradi va burnini tortib qo'ydi.
- Ukang o'zini juda katta tutyaptimi? - Barzangi atrofdagilarga murojaat qildi. - Bir paytlar bobom Tornlar shlyapalarini o'zlari tikishlarini aytgandi, chunki ularning aqlli va katta boshlariga mos keladigan bosh kiyim hech qaerda yo'q ekan! - Teddi hiringladi va barzangidan qo'rqqan ko'pchilik kursantlar unga qo'shilishdi.
