[IMG]
men.png
- Kechirasiz, janob Torn, - dedi u, - sizni telefonda so'rashyapti. Shoshilinch.
Richard uzr so'rab, telefonda gaplashgani ketdi. Qaynoq bahs davom etardi.
- Neft mamlakatlari hech ikkilanmasdan bo'g'zimizga pichoq qadashyapti, shunday emasmi? - dedi Buxer. - Nimaga ovqat masalasida biz boshqacha yo'l tutishimiz kerak?
- Biz barcha ochlarni yollanma fermerlarga aylantirmoqchi ekanmiz, - g'azabini zo'rg'a bosib gapirdi Axerton, - nega birato'la qulga aylantirib qo'ya qolmaymiz?
- Qul emas, iste'molchi, - Axertonning gapini to'g'riladi Buxer, - gap shundaki, biz ularning qornini to'ydiramiz!
- Men Polning fikriga qo'shilaman, - dedi Pasarian. - Menimcha, bu yo'nalishni rivojlantirish kerak.
Ular Richardni ko'rishdi. Uning rangi oqarib ketgandi.
- Kechqurun Merion olamdan o'tibdi, - dedi u. - Yurak yetishmovchiligi.
Axerton qotib qoldi.
- E, Xudo, Richard. Chuqur ta'ziya bildiraman.
Torn parishon holda bosh irg'adi: uning xayoli ko'mish marosimida edi.
- Sizlarni tark etishimga to'g'ri keladi, - u Axertonga murojaat qildi. - Meni vertolyotgacha kuzatib qo'y.

- Bo'pti, - dedi u.
- Pol, - dedi Torn, - iltimos, direktorlar kengashiga qo'ng'iroq qil. Zavod boshqaruvchisi maqomi bo'yicha barcha xorijiy vakillarga telegramma jo'nat.
- Bo'pti, bo'pti, - dedi Buxer.
- Yig'ilish o'n kundan keyin. Dafn marosimi esa uch kundan so'ng o'tkaziladi. Kardiologiya jamg'armasiga badal ham to'lash kerak. Bank va Uoll-strit bilan o'zim shug'ullanaman. - Richard hamma bilan xayrlashdi va Axerton hamrohligida tashqariga yo'l oldi.
Buxer uning yengidan tutdi.
- Richard, - so'z boshladi u, - balki ertaga birgalikda nonushta qilib, bu loyihaning muhokamasini yakunlarmiz.
Axerton norozilarcha qadamini davom ettirdi, Richard bu taklifga xotirjamlik bilan yondoshdi.
- Ha, albatta, - rozi bo'ldi u, - ertaga soat sakkizda uyimga kel.

Pasarian boshini sarak-sarak qildi. "Ha, u vaqtini zoe ketkazmaydi. Kampir o'ldi. Xo'sh, nima bo'pti, degan bo'lardi Buxer, boshqalar yashayapti-ku. Albatta, Pol Tornga hukmini o'tkazadi va Pol Buxerning fikri kompaniyaning hal qiluvchi qaroriga aylanadi".
Buxer Pasarianning xayolini bo'ldi.
- Demak, Tornlar shaharga ko'chishdimi? - qiziqdi u.
- Bugun, - bosh irg'adi hindu.
- Yana qish, - qunishdi Buxer. Va Tornning ko'rsatmalarini bajarish uchun telefon tomon ketdi.
Merion Torn hatto o'lib ham hammaga bir dunyo tashvish keltirgandi.
Ayni mana shu daqiqalarda Gibraltar bo'g'ozi yaqinida, Atlantika ummonidan o'ttiz ming fut balandlikda reaktiv samolyot uchib borardi. U Tel-Avivdagi aeroportdan ko'tarilib, Farb tomon yo'l olgandi.

Sayyohlar salonida ko'zlari chaqnoq mallasoch ayol o'tirardi. U Joan Xart edi. Doktor Uorren ma'lum qilganidek, u Richard Torndan intervyu olish uchun safarga chiqqandi. Ammo Joanni bu harakatga Torn taxmin qilganidek, oddiy qiziqish undamagandi.
Do'sti Maykl Morgan bedarak yo'qolganiga ham yetti yil bo'lgandi. Bu davr ichida Joanning o'zi qandaydir tadqiqotlar o'tkazdi: u Injilni va g'alati o'limlar bilan bog'liq ma'lumotlarni batafsil o'rgandi. Va bularning barchasi qandaydir tushunarsiz tarzda birgina bolakay - Demen Torn atrofida aylanardi.
Nihoyat Joan zimmasida turgan vazifani tushunib yetdi. Bugengagen Mayklni o'zining yordamchisiga aylantirishga uringan bo'lsa-da, amalga oshmadi. Ammo o'sha uchrashuvda Joan ham bor edi - u hammasini eshitgan va buning oddiy tasodif emasligini tushungandi. Va uni yetti yil ilgari qahvaxonaga yetaklagan Kuch, endi uni Iblis o'n uch yoshga to'lmasligi uchun harakat qilishga majbur etayotgandi. Zero, aynan o'sha kuni Iblis o'zining kim ekanligini anglab yetadi va unda Iblisni yo'q qilish uchun deyarli imkoniyat qolmaydi.

Joanning boshiga Kassandraning qismati tushgandi: unga hech kim ishonmasdi. Uni ilgaridan taniganlar uning ustidan kulishar, Joanning bashoratlari tez orada o'tib ketadigan alahsirash, deyishardi. Notanish kishilar undan xuddi telbani ko'rgandek qochardilar.
Joanning o'zi ham ancha vaqtgacha qilayotgan ishining to'g'riligiga to'liq ishonmadi. Bir hafta ilgari ham uni shubha-gumonlar qiynayotgandi. O'shanda unga Belvuar qo'rg'onidagi qazuv ishlari haqida reportaj yozish topshirilgandi. U anchadan buyon bu daqiqalarni kutayotgandi. Xarobalar orasida yurar ekan, Joan, shubhasiz XX asrda yashagan ikki kishining jasadi qoldiqlariga duch keldi. U ularni osonlik bilan tanidi. Joan Igael devorini ham diqqat bilan ko'zdan kechirdi.
Shundagina u Richard Tornga haqiqatni aytish uchun Shtatlarga uchishga qaror qildi.
Bevosita xavf ostida turgan barchani dahshatli xatardan ogoh qilish kerak edi, zero Shaytonning o'g'li ular orasida edi.
Vazifa og'ir va xatarli edi, ammo Joan bu vazifani haqiqiy e'tiqodi butun kishilarga xos quvonch bilan bajarishga harakat qilardi.
