[IMG]
men.png
- Hech kimni kutmaydigan birinchi raqamli samolyot. U yerda nima qilasiz? Prezidentga mamlakatni qanday boshqarish to'g'risida maslahat berasizmi?
- Yo'q, - javob berdi Torn uning hazilini tushunib. - Davlat kotibiga. Xo'sh, sizga qanday foydam tegishi mumkin?
Joan Xart yana sumkasini titkiladi va charm muqovali yon daftari bilan qalamini oldi. Ayolga yon daftar va qalam qandaydir kuch bag'ishlagandek edi. U ehtirossiz muxbirga aylandi. Joan o'z qurbonidan o'ziga kerakli ma'lumotlarni birma-bir sug'urib ola boshladi.
Aeroportgacha bo'lgan yo'lning yarmiga yetishganida intervyu o'yini Tornning joniga tegdi.
- Xart xonim, menga yettita savol berdingiz va ularning hammasi negadir pul bilan bog'liq, - dedi u.
- Pul butun dunyoni aylanishga majbur qiladi, shunday emasmi?
- Ha, nafaqat butun dunyoni - dedi Torn.
Joan Richardning asabiylasha boshlaganini sezdi, lekin eng asosiy gapni hech ayta olmasdi. Hozir mavridi emas. Sal keyinroq.

- M-m-m, otangiz muzey qurdirgan ekan, - u yon daftariga qarab oldi, - 1940 yilda. Bu unga necha pulga tushgan?
- O'n million atrofida.
- Otangiz birinchi marta Chikagoga kelganida birjaga ishga kirganmi?
- To'g'ri.
- Ayting-chi, u sizni va ukangizni kambag'allik nima ekanligini his qilishingiz uchun sovuq xonada yoki polda yotishga majbur qilmaganmi?
Torn xaxolab kulib yubordi.
- Bunaqa bema'ni gapni sizga kim aytdi?
Shu payt limuzin keskin tormoz berdi. Ular Michigan-avenyu yaqinidagi ko'tariluvchi ko'prikka yaqinlashishgandi. Ogohlantiruvchi qo'ng'iroqlar va o'chib-yonayotgan qizil chiroqlar kemani o'tkazib yuborish uchun ko'prik ko'tarilishini bildirib turardi. Richard mashina oynasidan qaradi va "Torn Indastriz"ga tegishli tankerni tanidi. Tornning yo'lini uning o'ziga qarashli kema to'sgandi.

Joan Xart bu imkoniyatdan foydalandi va kutilmaganda hujumga o'tdi:
- Siz Bugengagen bilan hech uchrashmaganmisiz?
- Yo'q, - javob berdi Torn Joanning mavzuni keskin o'zgartirganini his qilib.
- U faqatgina arxeolog bo'lmaganligini bilasizmi? Bugengagen eng avvalo ekzortsist - Shaytonni quvuvchi bo'lgan.
- Buning nima ahamiyati borligini tushunmayapman.
- Belvuar qo'rg'onini qazish paytida uning suyaklarini topishgan, - davom etdi Joan uning so'zlariga e'tibor bermay. - Buni bilarmidingiz?
- Kimningdir suyaklarini, Xart xonim. Menimcha, kimniki ekanligi rasman aniqlanmagan.
Ayolning ovozida qat'iy ishonch yangradi.
- U yerdan ikki kishining suyaklari topilgan, janob Torn. Biri - Bugengagenniki, ikkinchisi esa - Maykl Morgan ismli yosh arxeologniki. Maykl mening yigitim edi. Men ular bilan o'sha g'oyib bo'lishgan kuni uchrashganman.
Ayni shu lahzada shlagbaum ko'tarildi va Myurrey motorni yurgizdi. Torn shartta so'zlashuv qurilmasining tugmasini bosdi.

- Myurrey, to'xtab turing. Xart xonim tushib qoladi.
Joan shoshilib so'zlay boshladi:
- O'limidan bir hafta ilgari ukangiz Bugengagen bilan uchrashish uchun Isroilga kelgan. Uning o'limidan bir necha kun keyin esa Bugengagen va Maykl Morgan tiriklayin ko'milishgan. Bu sizni hushyor torttirmaydimi, janob Torn?
"Shu yetmay turuvdi, - o'yladi Richard. - hozir u menga Kennedini kim o'ldirganini aytadi". U sovuqqonlik bilan dedi:
- Sizni haydab tushirishga meni majbur qilmang. Biz harakatni to'xtatib qo'ydik.
- Politsiya ukangizni nima uchun otganini bilasizmi? - Joanning yovvoyilarcha yonayotgan ko'zlarida qandaydir telbalik zohir bo'ldi. - Pichoq haqida biror narsa bilasizmi?
Myurrey mashinadan tushdi va orqa eshikni ochdi.
- Menga bitta narsa ma'lum: siz o'zingizning va mening vaqtimni olyapsiz...
- Iltimos, menga quloq soling! - o'tindi ayol. - Bularning barchasini o'rganish uchun men bir necha yilni sarfladim. Hammasi mos kelyapti... endi...

Richard ingrab yubordi. Faqat bu emas. U ukasining o'limi atrofidagi sirli tuman butunlay tarqalib ketgan, deb o'ylardi.
Myurrey qo'pollik bilan Joanning qo'lidan tortdi. U o'rindiqqa yopishgancha qichqirdi:
- Hayotingiz xavf ostida!
- Yo'qoling bu yerdan! Sizni qaytib ko'rmay! Tushundingizmi?
- Xudoga ishoning! - qichqirdi Joan.
- Myurrey, Xudo haqqi!
- Xudoga ishoning! - ho'ngrab yig'lab yubordi ayol.
Myurrey uni mashinadan tortib tushirdi va eshikni yopdi. Joan turgan joyida qichqirishni davom ettirdi:
- Xudo haqqi! Faqat ugina sizni himoya qila oladi! Igael devorini ko'ring, janob Torn! Shaytonning yuzini ko'ring va u kimning yuzi ekanligini ayting!
- Myurrey, jin ursin. Bu telbadan tezroq uzoqlashaylik! - o'shqirdi Torn.
Myurrey mashinaga uchib chiqdi va motorni o't oldirdi.
