[IMG]
men.png
5
Axertonning o'limidan so'ng oradan bir oy o'tgan bo'lsa-da, Buxer hali ham yangi xonasini jihozlash ishlarini tugatmagandi. Ilgari gulqog'oz yopishtirilgan devorlar yog'och koshin bilan bezatildi, Axertonning eski kreslolari o'rnida yaltiroq qora charm qoplangan zamonaviy mebellar paydo bo'ldi. Kotib va mudir o'tiradigan xona devoridagi Axertonning surati olib tashlanib, uning o'rniga Buxerning surati ilindi.
Limuzin "Torn Indastriz" binosi oldiga kelib to'xtashi bilan unga Buxerning yordamchisi Bayron peshvoz chiqdi. Buxer qo'lida jurnal bilan mashinadan tushdi.
"Forchun" jurnali muqovasida Buxerning surati bor edi. Pol mana shu suratni oldirish uchun ataylabdan Nyu-Yorkka borib kelgandi. Jurnal muqovasida shunday yozuv ko'zga tashlanib turardi: "Pol Buxer, "Torn Indastriz"ning yangi prezidenti".
Buxer yo'l-yo'lakay yordamchisiga bosh irg'ab salomlashgandek bo'ldi.
- Surat chiroyli chiqibdi, - dedi Bayron.
Buxer indamadi.
Ular liftni kutib turishardi.
- Pasariandan biror xabar bormi? - so'radi Buxer.
- Yo'q, janob, - dedi Bayron. - Butunlay yo'qolib ketdi.
Liftning eshiklari ochilgach, ular ichkari kirishdi. Buxer tugmani bosdi. Lift uchinchi qavatga yetganda Bayron Buxerga kutilmagan xabarni yetkazdi: "Richard sizni hozirning o'zida ko'rmoqchi".

- O! - dedi Buxer cho'zib. - U shu yerdami?
- Ha, - javob berdi yordamchisi.
BMTning butun bir delegatsiyasi bemalol joylashadigan stol ortida Torn qahva ichib o'tirardi.
Buxer salomlashish uchun og'zini ochishga ulgurmay Richard unga o'shqirdi:
- Pasarianga Hindistonda pishirib qo'yibdimi?
Buxer diplomatini stol ustiga qo'yib o'tirdi. "Unga ichidagini to'kib solishga imkon berishim kerak. Bu hammasi nimani anglatishini aniqlashga urinib ko'raman. Tornning ko'rinishi juda g'alati-ya, - o'ylardi Buxer. - Yoqasi ochiq, galstugi yo'q. Soqolini ham olmabdi. To'g'ri, Richardning shunday qilishga haqqi bor, lekin u agar jiddiy sabab bo'lmasa ishga bu ahvolda kelmasdi".
U jahlga mingandi.
- Men u yerdan yer sotib olish masalasida bir narsani aniqlashim kerak edi, - so'z boshladi Buxer. - Kim...
- Yer sotib olyapmizmi? - xavotirlanib so'radi Torn.

- Siz mening ma'ruzamda aytgan barcha fikrlarimni amalga oshirishimga rozi bo'lgandingiz, - davom etdi Buxer o'zini oqlar ekan. - Bu kompaniya prezidenti bo'lishimning asosiy sharti edi.
Torn yuzini changalladi va uf tortdi.
- Lekin bu sizning meni o'z kompaniyamni boshqarishdan chetlatishingizni anglatmaydi.
- Siz ta'tilda edingiz, - e'tiroz bildirdi Buxer. - Sizni bezovta qilgim kelmadi. Bu so'zlarni aytarkan, Pol aytayotgan gaplarining naqadar soxta chiqayotganligini tushunib turardi.
- Meni har qanday paytda telefon orqali topish mumkin edi, - dedi Torn. So'ng boshini egdi va g'amgin holda qo'shib qo'ydi. - Bill hech qachon men bilan maslahatlashmasdan turib bir ishga qo'l urmasdi.
- Men Bill emasman, - dedi Buxer.
- Bill bo'lishingizni kutmayman ham, - o'shqirdi Richard. - Lekin kompaniyam tartib-qoidalariga amal qilishingizni talab qilaman!
O'rtaga sukunat cho'kdi. Torn sal yumshadi.
- Pol, - dedi u, - siz zo'r mutaxasssissiz. Yuqori lavozimda o'tirishga arziysiz. Lekin iltimos, bu mening kompaniyam ekanligini hech qachon unutmang.

- Bu boshqa takrorlanmaydi. - Aftidan Buxer chin dildan tavba qilayotgandi. U suhbat mavzuini o'zgartirishga urindi: - Siz Pasarianni so'rabsiz. Nega?
- Uning P-84 uskunasiga nimadir bo'lganga o'xshaydi, - dedi Torn. - Uolker shuning uchun asabiylashyapti. Uolker doim qo'rqadi: u biror halokat yoki noxushlik yuz berishidan tashvishlanib yuradi, lekin bu safar meni ham xavotirga soldi.
- Bu ish bilan shug'ullanaman, - ishontirdi Buxer o'rnidan turarkan. U suhbat tugaganligini anglagandi.
- Ishonaman. - Torn Buxerning xonadan chiqib ketishini kutdi, so'ng o'rnidan turib deraza yoniga keldi. Tashqaridagi manzarani ko'rib u doim tinchlanardi, lekin hozir emas. Torn qattiq g'azablangandi.
Axertonning fojiali o'limidan buyon uning yuragini nimadir kemirar, lekin Richard aynan nimadan tashvishlanayotganini bila olmasdi.
