[IMG]
men.png
Uning buyrug'ini bolalar ham eshitishdi. Yo'lboshlovchi vahimaga tushganicha atrofga alangladi. Gaz ular turgan joyga yetib kelayotgandi.
Boshqaruv pultida halokat tugmasi bor edi. Pasarian bor kuchi bilan tugmani bosdi. Tugma ishlamadi. Bu tugmani bugun ertalab uning boshlig'i Buxer o'rnatganini bechora hindu qaerdan ham bilsin?
Shu onda u kursantlarning baqir-chaqirini eshitdi. Bolalar nafas olisholmas va yo'talishar, bir-birlariga urilganlaricha chiqish yo'lini qidirishardi. Ularning ko'zlaridan duvillab yosh oqardi. Ba'zi bolalarning yuz va qo'llarida pufakchalar paydo bo'ldi.
Bolalarni aylantirib yurgan xodim yuk liftiga yugurdi va jazavaga tushganicha barcha tugmalarni bosib chiqdi.
Lekin bu befoyda edi. Lift ishlamayotgandi.
Faqatgina Demen vahimaga tushmagandi. Gaz unga ta'sir qilmayotgandi. U hushidan ayrilayotgan do'stlariga tikildi. Va shu lahzada u o'zining qanday kuchga ega ekanligini his qildi.

Bola yana bir narsani tushundi. Unda tanlash imkoniyati paydo bo'lgandi. U hozir bu yerdan chiqib ketishi mumkin. U ushbu halokatda tirik qolgan yagona odamga aylanadi. Lekin yana bir narsa bor. Demen bu yerdagilarni qutqarishi va qahramonga aylanishi mumkin.
Demen bolalarga yordam berishga qaror qildi. U qahramon bo'lmoqchi edi. Bola darhol yuqoriga qaradi va tomga chiqadigan tuynukka olib boradigan narvonni ko'rdi.
- Bu yoqqa! - qichqirdi Demen va narvon tomonga yugurdi. U epchillik bilan yuqoriga ko'tarildi va tuynuk qopqog'ini ochdi. Ichkariga quyosh nuri va toza havo kirdi.
Qolganlar oyoqlarini zo'rg'a bosib yo'lak bo'ylab kela boshlashdi. Ular bir-birlariga suyanib olishgandi. Bolalar narvonni paypaslab topishdi, tomga chiqishgach esa yutoqqancha nafas ola boshlashdi.

Kutilmaganda Demen Pasarianni eslab qoldi. U ichkariga tushdi. So'ng zina bo'ylab yugurib ketdi.
Zal yashil tusli zaharli gaz bilan to'lgandi. Demen yanada pastki qavatga tushdi.
Shu yerda u Pasarianni ko'rdi. Hindu qimirlamay yotardi. Uning qo'li yorilgan quvur tomon cho'zilgandi. Chamasi, u oqib chiqayotgan zaharni qo'li bilan to'xtatishga uringandi. Yuzi va qo'llaridagi pufaklar uni tanib bo'lmas darajaga keltirgandi.
Demen ortiga qaytdi va tomga chiqdi.
Bolalar hali ham og'zilarini katta-katta ochgancha nafas olishar, o'pkalaridan hushtak chalgandek ovoz chiqardi.
Demen Markni izlay boshladi. U akasi qanday holatda ekanligini bilmoqchi edi.
Markni qidirar ekan, Demen o'zining qanday kuchga ega ekanligini anglab yetdi - bu unga yoqa boshladi. Va u, o'zining aslida kim ekanligiga ham tupurdi.
