Ayollar va xayollar (hajviya) [Anvar Obidjon]

Ayollar va xayollar (hajviya) [Anvar Obidjon]

Ehtiros Kamroq Boʻlsin – Buncha xilvat ekan bu yer? – Ha! Bunday xilvat joylar savob ish uchun yaratilmagan! – Voy, nima qilyapsiz? Qoʻlingizni oling. Erim bilib qolsa... – Tupurdim oʻsha eringizga. Oshqovoq nima-yu, u nima. – Hamma erkaklar ham oshqovoq. Faqat, poʻsti har xil. – Bahomni oshirib yubordingiz. Rahmat! Men ahmoq sizni tushlarimda koʻrib yuribman. Kecha tushimda hatto oʻpib oldim. Mana bunday qilib... – Boʻldi! Bas! – stolni shapillatib qichqirdi rejissyor. – Repetitsiya tamom! U grimxona sari borayotgan artist yigitning ortidan xoʻmrayib qarab qoʻygach, «engiltak ayol» rolida oʻynayotgan aktrisaga oʻgrilib, doʻngʻilladi: – Bugun sal kechiksam kerak. Qizchamizni bogʻchadan olib, toʻgʻri uyga joʻna. Koʻnikib Ham Ketarsiz – Oʻzi nima gap? Nega yigʻlayapsiz, singlim? – Anavi uyatsiz chol... – Xoʻsh, xoʻsh? – Manavi yerimni... – Xullas... tuf, – ogʻzidagi nosni purkab, bamaylixotir gap boshladi chol, – oyimtillaning oʻsha joyini siypaladim. Siypalashga haqqim bor. – Hm-m, bilasizmi... Sirasini aytganda, bizda odat shunaqa, singlim. Anavi ayollar ham dastlabki paytlarda sizga oʻxshab qimtinib yurishardi. Mana endi, siypalash u yoqda tursin, hatto, kiyimingni yech desangiz ham... Qisqasi, sharoitga tezroq koʻnikishga urining... Direktorning bu gapidan keyin, goʻsht kombinatining tashmachilikka qarshi kurashuvchi qorovuli tantanavor qiyofada soqol silab qoʻydi. 1978

Muallif: Anvar Obidjon