KO‘Z (ChASHM) Ibn Sirin (r.a.) aytadiki, tushdagi ko‘z uzoqni ko‘ruvchi kishi bo‘lib, u orqali hidoyat yo‘lini topadi. Ko‘k ko‘z bid’atdir, shahlo, ko‘z farzand bo‘ladi. Agar tushida ko‘r bo‘lib qolganini ko‘rsa, to‘g‘ri yo‘lni yo‘qotishiga yoki farzandining o‘lishiga dalildir. Agar bitta ko‘zining ko‘r bo‘lib qolganini ko‘rsa, yarim dinining ketishi, bir qo‘li, bir oyog‘i yoki tanining bir qismi bilan ulug‘ gunoh qilishiga yoki unga biror musibat yetishiga dalil bo‘ladi. Kirmoniy (r.a.) aytadiki, agar ko‘zga surma tortganini ko‘rsa, dinini pok tutishga intilishiga dalildir. Agar surma tortishdan maqsadi ziynat va yasanish bo‘lsa, aziz bo‘lish uchun odamlarning ko‘ziga o‘zini omonatkor va dindor qilib ko‘rsatishiga dalildir. Agar kimdir unga ko‘ziga tortish uchun surma berganini ko‘rsa, surma mikdoriga muvofiq mol topishini bildiradi. Agar ko‘z nuri zaif bo‘lib qolganini ko‘rsa, zohir va botinda (tashqi va ichki tomondan) ikkiyuzlamachi va munofiq bo‘lishga dalildir. Agar tanasida ko‘p ko‘zlar borligini va hamma narsani mukammal ko‘ra olayotganini tush ko‘rsa, dinning farzlarini va sunttalari bajo keltirishga dalildir. Agar kimdir uning ko‘zlarini o‘yib olgan bo‘lsa, ko‘ziga ravshanlik berib turuvchi narsalar, masalan, ayol farzand, saroy, bog‘ uning nazaridan g‘oyib bo‘lishiga dalildir, chunonchi, uni boshqa ko‘rolmaydi. Jobir Mag‘ribiy (r.a.) aytadiki, ko‘zi po‘latdan ekanini ko‘rsa, sirlari ochilishiga dalildir. Ikki ko‘zining shishib ketganini va ularni ocholmayotganini ko‘rsa, yoqimsiz kishi bilan suhbat qurishini bildiradi. Ko‘z nurining kamayganini ko‘rsa, toatida nuqson yuz berishiga dalil bo‘ladi. Agar ikki ko‘zini o‘yilgan holda ko‘rsa, shari’atdan bebahra bo‘lishiga dalildir. Agar yuzining o‘rtasida bitta ko‘z borligini ko‘rsa, din to‘g‘risida og‘zidan nosoz so‘z chiqishiga dalildir. Agar ko‘zlarining ravshan ekanini, biroq odamlar uni ko‘r yoki shapko‘r deb o‘ylayotganlarini ko‘rsa, zohiriga nisbatan botinida dini yaxshiroq ekaniga dalildir. Agar bir kishining ko‘zi qora bo‘lib, so‘ng ko‘k bo‘lib qolganini ko‘rsa, yomonlik va ahvolining o‘zgarishiga dalil bo‘ladi. Alloh ta’olo aytadi: U kunda Biz jinoyatchilarni ko‘zlari (qo‘rquvdan) ko‘k (nursiz) bo‘lib qolgan hollarida yig‘urmiz. . . (Toho surasi, 102-oyat). Agar ikki ko‘zining oqarib, so‘ng yana qora bo‘lib qolganini ko‘rsa, kasal bo‘lishiga yoki biror kishi bilan o‘rtalarida hurmat paydo bo‘lishiga dalildir. Ko‘zlari butunlay qorayib ketganini, oqi aslo yo‘q ekanini ko‘rsa, takabbur bo‘lishiga dalildir. Agar bir ko‘ziga ofat yetganini ko‘rsa, farzandlariga ofat yetishini bildiradi. Agar bir kishining qo‘l cho‘zib, bir ko‘zini o‘yib olganini ko‘rsa, farzandi uni yo‘ldan urishiga dalildir. Agar kimdir uning ko‘zini bog‘lab qo‘yganini yoki qo‘li bilan bekitganini ko‘rsa, farzandiga ziyodalik yetishiga yoki moli ketishiga yoki biror gunoh qilishiga dalildir. Agar ko‘zlaridan qon oqayotganini ko‘rsa, farzand tufayli g‘am yetishiga yoki moli nuqson topishiga dalildir. Ismoil Apgas (r.a.)ning aytishicha, har kim ko‘zini quloqqa aylanganini, qulog‘i esa ko‘zga aylanganini ko‘rsa, xotin olishi va qiz tug‘ilishiga yoki har ikkovining qo‘shilishiga dalildir. Agar qo‘li va kaftida ko‘z borligini ko‘rsa, mol topishini bildiradi. Agar ko‘zida oqi borligini ko‘rsa, unga qayg‘u yetishiga dalildir. Alloh ta’olo aytadi: Keyin ulardan yuz o‘girib: Esizgina Yusuf! dedi. G‘am-g‘ussadan uning ko‘zlari oqarib (ojiz bo‘lib) qoldi va u endi hazindir (Yusuf surasi, 84-oyat). HIKOYaT. Hikoya qilishlaricha, bir kishi Doniyol (a.s.)ning oldiga kelib, dedi: Tushimda o‘ng ko‘zim chap ko‘zimni o‘payotganini ko‘rdim. Doniyol alayhissalom: Ey odam, Xudodan qo‘rq va tavba qil, undan keyin qo‘shni xotinga hiyonat qilma, toki Xaq ta’oloning azobidan emin bo‘lg‘aysan, — dedilar. U kishi: Tavba qildim, bundan buyon uylanaman, — dedi. Ja’far Sodiq (r.a.) aytadiki, tushdagi ko‘z yetti narsani bildiradi: yorug‘likni; pok dinni; islomni; farzandni; molni; ilmni va dinda ziyodalikni.
КЎЗ (ЧАШМ) Ибн Сирин (р.а.) айтадики, тушдаги кўз узоқни кўрувчи киши бўлиб, у орқали ҳидоят йўлини топади. Кўк кўз бидъатдир, шаҳло, кўз фарзанд бўлади. Агар тушида кўр бўлиб қолганини кўрса, тўғри йўлни йўқотишига ёки фарзандининг ўлишига далилдир. Агар битта кўзининг кўр бўлиб қолганини кўрса, ярим динининг кетиши, бир қўли, бир оёғи ёки танининг бир қисми билан улуғ гуноҳ қилишига ёки унга бирор мусибат етишига далил бўлади. Кирмоний (р.а.) айтадики, агар кўзга сурма тортганини кўрса, динини пок тутишга интилишига далилдир. Агар сурма тортишдан мақсади зийнат ва ясаниш бўлса, азиз бўлиш учун одамларнинг кўзига ўзини омонаткор ва диндор қилиб кўрсатишига далилдир. Агар кимдир унга кўзига тортиш учун сурма берганини кўрса, сурма микдорига мувофиқ мол топишини билдиради. Агар кўз нури заиф бўлиб қолганини кўрса, зоҳир ва ботинда (ташқи ва ички томондан) иккиюзламачи ва мунофиқ бўлишга далилдир. Агар танасида кўп кўзлар борлигини ва ҳамма нарсани мукаммал кўра олаётганини туш кўрса, диннинг фарзларини ва сунтталари бажо келтиришга далилдир. Агар кимдир унинг кўзларини ўйиб олган бўлса, кўзига равшанлик бериб турувчи нарсалар, масалан, аёл фарзанд, сарой, боғ унинг назаридан ғойиб бўлишига далилдир, чунончи, уни бошқа кўролмайди. Жобир Мағрибий (р.а.) айтадики, кўзи пўлатдан эканини кўрса, сирлари очилишига далилдир. Икки кўзининг шишиб кетганини ва уларни очолмаётганини кўрса, ёқимсиз киши билан суҳбат қуришини билдиради. Кўз нурининг камайганини кўрса, тоатида нуқсон юз беришига далил бўлади. Агар икки кўзини ўйилган ҳолда кўрса, шариъатдан бебаҳра бўлишига далилдир. Агар юзининг ўртасида битта кўз борлигини кўрса, дин тўғрисида оғзидан носоз сўз чиқишига далилдир. Агар кўзларининг равшан эканини, бироқ одамлар уни кўр ёки шапкўр деб ўйлаётганларини кўрса, зоҳирига нисбатан ботинида дини яхшироқ эканига далилдир. Агар бир кишининг кўзи қора бўлиб, сўнг кўк бўлиб қолганини кўрса, ёмонлик ва аҳволининг ўзгаришига далил бўлади. Аллоҳ таъоло айтади: У кунда Биз жиноятчиларни кўзлари (қўрқувдан) кўк (нурсиз) бўлиб қолган ҳолларида йиғурмиз. . . (Тоҳо сураси, 102-оят). Агар икки кўзининг оқариб, сўнг яна қора бўлиб қолганини кўрса, касал бўлишига ёки бирор киши билан ўрталарида ҳурмат пайдо бўлишига далилдир. Кўзлари бутунлай қорайиб кетганини, оқи асло йўқ эканини кўрса, такаббур бўлишига далилдир. Агар бир кўзига офат етганини кўрса, фарзандларига офат етишини билдиради. Агар бир кишининг қўл чўзиб, бир кўзини ўйиб олганини кўрса, фарзанди уни йўлдан уришига далилдир. Агар кимдир унинг кўзини боғлаб қўйганини ёки қўли билан бекитганини кўрса, фарзандига зиёдалик етишига ёки моли кетишига ёки бирор гуноҳ қилишига далилдир. Агар кўзларидан қон оқаётганини кўрса, фарзанд туфайли ғам етишига ёки моли нуқсон топишига далилдир. Исмоил Апгьас (р.а.)нинг айтишича, ҳар ким кўзини қулоққа айланганини, қулоғи эса кўзга айланганини кўрса, хотин олиши ва қиз туғилишига ёки ҳар икковининг қўшилишига далилдир. Агар қўли ва кафтида кўз борлигини кўрса, мол топишини билдиради. Агар кўзида оқи борлигини кўрса, унга қайғу етишига далилдир. Аллоҳ таъоло айтади: Кейин улардан юз ўгириб: Эсизгина Юсуф! деди. Ғам-ғуссадан унинг кўзлари оқариб (ожиз бўлиб) қолди ва у энди ҳазиндир (Юсуф сураси, 84-оят). ҲИКОЯТ. Ҳикоя қилишларича, бир киши Дониёл (а.с.)нинг олдига келиб, деди: Тушимда ўнг кўзим чап кўзимни ўпаётганини кўрдим. Дониёл алайҳиссалом: Эй одам, Худодан қўрқ ва тавба қил, ундан кейин қўшни хотинга ҳиёнат қилма, токи Хақ таъолонинг азобидан эмин бўлғайсан, — дедилар. У киши: Тавба қилдим, бундан буён уйланаман, — деди. Жаъфар Содиқ (р.а.) айтадики, тушдаги кўз етти нарсани билдиради: ёруғликни; пок динни; исломни; фарзандни; молни; илмни ва динда зиёдаликни.
Tush.UZ - Tushlar tabiri