Tush.UZ - Tushlar tabiriYurtimiz so‘nggi yillarda xalqaro miqyosidagi nufuzli futbol va futzal bo‘yicha musobaqalarni qabul qilish yuzasidan katta qadamlarni tashlamoqda. Ayniqsa, FIFAning 2024 yilgi futzal bo‘yicha Jahon chempionati mezbonligini O‘zbekistonga ishonib topshirishi bu borada olib borilgan keng ko‘lamli ishlarning mahsuli bo‘ldi.
Futzal bo‘yicha dunyo mundialining hal qiluvchi uchrashuvlari mezboni sifatida uchta betakror shaharlar – poytaxt Toshkent, qadimiy Ipak yo‘li chorrahasida joylashgan Buxoro va vodiy durdonasi sanaladigan Andijon tanlab olindi.
Markaziy Osiyoda ilk bor o‘tadigan FIFA shafeligidagi musobaqada dunyoning eng kuchli 24 terma jamoasi futzal bo‘yicha Jahon chempionligi uchun kurash olib boradi. Tarixda 10-bor tashkil etilayotgan musobaqada amaldagi g‘olib Portugaliyadan tortib, besh karra chempion Braziliya, shuningdek, Fransiya va Yangi Zelandiya kabi debyutantlar joriy yilning 14-sentyabr va 6 oktyabr kunlari yurtimizda jam bo‘lishadi. Toshkent, Buxoro va Andijon shaharlari mezbonlik qiladigan mundialning qur’a tashlash marosimi kelasi oy yurtimizda tashkil etiladi.
«Biz O‘zbekistonning boy va rang barang madaniyatini aks ettiruvchi uchta shahri mezbon sifatida tanlab olinganidan juda ham mamnunmiz. Ishonchim komil – 24 ta ishtirokchi terma jamoa buyerda o‘zini xuddi uydagidek his etadi va eng yaxshi sharoitlarda mashg‘ulot va o‘yinlarini o‘tkazish imkoniga ega bo‘lishadi.
Mazkur musobaqa O‘zbekistonda, umuman Markaziy Osiyoda o‘tkaziladigan dastlabki FIFA turniri sanaladi va bu jihat musobaqaning qiymati va ahamiyatini yanada oshiradi. Bu tashkilotimizning yanada global miqyos kasb etish bo‘yicha maqsadlariga to‘la mushtarak keladi», — dedi FIFA musobaqalar o‘tkazish bo‘limi rahbari Haime Yarza.
Bu xususda O‘zbekiston futbol assosiasiyasi birinchi vise-prezidenti Ravshan Ermatov shunday dedi:
«Bu ajoyib tadbirga mezbonlik qilish biz uchun katta sharaf. O‘zbekiston jadal sur’atlar bilan rivojlanayotgan ajoyib mamlakat va biz endi dunyoning eng yaxshi futzalchilari va murabbiylarini qabul qilish va ularni ushbu maftunkor maskan bilan yanada yaxshiroq tanishtirishga hozirlik ko‘rishimiz mumkin. Futzalning butun dunyoga mashhurligini inobatga olgan holda, butun jahondan minglab muxlislar tribunalarni to‘ldirib, o‘z jamoalarini qo‘llab-quvvatlashi, barchaning ushbu tadbirdan bahramand bo‘lishi va ajoyib muhit yaratishlarini kutyapmiz.»
Qayd etish joiz, futzal bo‘yicha FIFA Jahon chempionati-2024 rasmiy qur’a tashlash marosimi shu yilning 26 may sanasida tashkil etiladi.