Lego’ning 358 mingdan ortiq detali yordamida to‘liq o‘lchamli Ferrari F40 yasaldi

Kaliforniyadagi Legoland parkiga Lego konstruksiyalaridan yig‘ilgan Ferrari F40 olib kelindi. Ko‘plab mashhur superkarlar Shvetsiya konstruktori yordamida o‘z modellarini allaqachon yaratgan, biroq qandaydir sababga ko‘ra navbat F40 ga yetib kelmayotgan edi. Endilikda afsonaviy superkarning ham 358 mingdan ortiq Lego kubiklaridan yig‘ilgan versiyasi bor, deb xabar beradi “Motor.

Lego yordamida Ferrari nusxasini yaratishga 1800 soat yoki 75 sutka sarflangan, uni yig‘ishga esa 1900 soat — qariyb 80 sutka vaqt ketgan.

Plastik kuzovga qaramay, Ferrari F40 ning Lego-nusxasini og‘irligi haqiqiy superkar og‘irligiga yaqinlashgan — 1360 kilogrammdan ortiq. Modelni yiqqanlar original mashina o‘lchamlariga maksimal darajada yaqinlashishga uringan: mashina uzunligi 4,3 metrni, eni — 1,8 metrni, g‘ildiraklar bazasi 2,4 metr bo‘lgan holatda balandligi esa 1,2 metrni tashkil etadi.

Old va haydovchi o‘rindig‘idan tashqari qolgan ikkita kovshsimon o‘rindig‘i ham Lego detallaridan ishlangan. Bunga ham o‘ziga yarasha sabab bor: Legoland tashrif buyuruvchilariga nafaqat superkar bilan suratga tushishga, balki noyob nusxa boshqaruviga o‘tirib ko‘rishga ruxsat beriladi.

Eslatib o‘tamiz, 2021-yilning iyun oyida Lego kompaniyasi 400 mingta konstruktor detallaridan tarkib topgan to‘liq o‘lchamli Lamborghini Sian giperkarini taqdim etgandi. Uni yaratish ustida 15 nafar mutaxassis 8660 soat ish olib borgan. 1:1 masshtabdagi o‘yinchoq giperkar Lamborghini Sian FKP 37 modeli dizaynini takrorlaydi.