Farg‘onada Damas’lar ortilgan MAN yuk mashinasiga boshqa MAN kelib urildi

Ijtimoiy tarmoqlarda Damas’lar olib ketayotgan yuk mashinasi YTHga uchragani haqida xabarlar tarqaldi. Yo‘l harakati xavfsizligi xizmati holat yuzasidan rasmiy ma’lumot berdi.

Ma’lum qilinishicha, voqea 4-may kuni soat 15:30 larda, Farg‘ona viloyati, Uchko‘prik tumani, Mehnatobod qishlog‘i hududidan o‘tgan avtomobil yo‘lida yuz bergan.

Haydovchi H.A. MAN yuk avtomobilida harakatlanayotib, o‘zidan oldinda, svetoforning taqiqlovchi chirog‘ida to‘xtab turgan haydovchi I.U. boshqaruvidagi MAN yuk avtomobiliga ulangan, yengil avtomobillarni tashishga mo‘ljallangan yarim tirkamaning orqa tomoniga to‘qnashgan.

Shuningdek, zarb oqibatida boshqaruvni yo‘qotib, o‘zidan oldinda bo‘lgan yana bir haydovchi A.K. boshqaruvidagi Cobalt’ning yon tomoniga urilgan.

YTH oqibatida haydovchi H.A. yengil tan jarohati bilan shifoxonaga murojaat qilgan. To‘qnashuvda ishtirok etgan transport vositalariga hamda yarim tirkama ustiga ortilgan Damas’larning to‘rt donasiga texnik shikast yetgan.

Qayd etilishicha, hozirda ushbu YTH yuzasidan Uchko‘prik tumani IIB YHXG xodimlari tomonidan surishtiruv harakatlari olib borilmoqda.