AQSHda Lamborghini ishqibozi Honda’ni Diablo GT nusxasiga aylantirdi (foto)

AQSHda Lamborghini ishqibozi o‘zining Acura NSX avtomobilini Italiya modeliga aylantirishga muvaffaq bo‘ldi, deb xabar beradi “Motor”.

1999—2000-yillarda Lamborghini Diablo superkari restayling qilingach, 575 ot kuchini taqdim etishga qodir 6 litrli V12 dvigateli o‘rnatilgan GT versiyadan 83 ta kupe yasalgan.

Sotuvchining so‘zlariga ko‘ra, 1991 ASPT nomli mashina (1991-yilda “ehtiyot qismlardan yig‘ilgan”) standart Honda NSX shassisidan tashkil topgan. Unga kuzov detallari — “gilyotina” kabi ochiluvchi eshiklar, Lamborghini’ning original elementrlari yoki Italiya avtomobil ishlab chiqaruvchisining yapon kupesiga moslashtirilgan ehtiyot qismlari o‘rnatilgan.

Texnik jihatdan 1991 ASPT bazaviy modelni to‘liq takrorlaydi. Motor bo‘lmasi V12 dvigateliga moslashtirilgan bo‘lsa-da, kupega 270 ot kuchili V6 o‘rnatilgan va u mexanik uzatmalar qutisi yordamida boshqariladi.

Sotuvchi o‘zining qo‘lbola Lamborghini Diablo GT’sini sotishga tayyor. Uning ta’kidlashicha, mazkur mashinaga xizmat ko‘rsatish original Italiya superkaridan arzonga tushadi va tashqi ko‘rinishi jihatidan uni haqiqiysidan ajratib bo‘lmaydi. Qo‘lbola model kamida 175 ming dollarga baholanmoqda.

Avvalroq so‘nggi Lamborghini Aventador auksion orqali 1,6 mln dollarga sotilgani, Lamborghini emblemasi brilliantdan ishlanib, 40 ming dollarga baholangani to‘g‘risida xabar berilgandi.