Tush.UZ - Tushlar tabiriQayd etilishicha, o‘tgan 2023 yilda Olmaliq kon-metallurgiya kombinati tomonidan 31,7 trillion so‘mlik sanoat mahsuloti ishlab chiqarilgan. 1 128,2 million dollarlik investisiya loyihalari amalga oshirilib, 661,9 million dollarlik mahsulot eksport qilingan. Mahalliylashtirish dasturi bo‘yicha 429 milliard so‘mlik mahsulot tayyorlangan. Mahsulotlarning tannarxini tushirish bo‘yicha 404,7 milliard so‘mlik natija qayd etilgan. 14,95 trillion so‘m mablag‘ byudjetga to‘lab berilgan, 6,7 trillion so‘m sof foyda olingan. 163,5 milliard so‘mlik geologiya-qidiruv ishlari bajarilgan.
“Raqamli OKMK – 2030” konsepsiyasi Olmaliq kon-metallurgiya kombinatining barcha ishlab chiqarish va biznes jarayonlarini raqamlashtirish, ma’lumotlarni jamlash, tahlil qilish va tezkor qaror qabul qilishga qaratilgan bo‘lib, ushbu yo‘nalishda 2023 yil mobaynida 34 ta loyiha amaliyotga tadbiq etilgan. O‘tgan yil davomida biznes va texnologik jarayonlarni raqamlashtirish hamda ularni maqbullashtirish evaziga 224 milliard so‘m iqtisod qilingan.
OKMKda investisiyaviy loyihalar ham muvaffaqiyatli amalga oshirib kelinmoqda. Xususan, “Yoshlik-1” loyihasining tog‘-kon majmuasi bo‘yicha 6 ta ob’ekt, 3-mis boyitish fabrikasi bo‘yicha 6 ta ob’ektning qurilishi yakunlangan. Yangi metallurgiya majmuasining qurilishi bo‘yicha dastlabki loyiha ishlari boshlangan.
Shuningdek, joriy yilda ham mazkur yo‘nalishlarda olib borilayotgan ishlar jadallashtiriladi. Jumladan, 32,2 trillion so‘mlik sanoat mahsulotlari ishlab chiqarilib, 2 136,4 million dollarlik investisiyaviy loyihalar amalga oshiriladi. 1 016,6 milliard so‘mlik mahalliylashtirilgan mahsulotlar ishlab chiqariladi. 15,73 trillion so‘m mablag‘ byudjetga yo‘naltirilishi rejalashtirilgan.
Mis boyitish fabrikasida amalga oshirilgan ishlar natijasida rudadan mis ajratish darajasi 85 foizga chiqarilishi ta’minlandi. Fabrikada texnologik jarayonlarda ishtirok etuvchi asosiy qurilmalari diagnostika tizimi (avariya holatlarining erta oldini olish evaziga to‘xtashlar sonini kamaytirish) hamda ruda-suv jarayonini avtomatlashtirish tizimi sinov tarzda ishga tushirildi. Bu yiliga 1,8 million kub suvni tejaydi.
2024 yil davomida biznes va texnologik jarayonlarni raqamlashtirishni jadallashtirish maqsadida 18 ta loyiha amalga oshirilishi rejalashtirilgan. Xususan, “Qalmoqqir” va “Yoshlik-1” konlarida ishlarni bajarishda tezkor boshqaruv tizimini joriy etish yakuniga yetkaziladi. Mis boyitish fabrikasida asosiy uskunalarni diagnostika qilish va tegirmonlarni ruda va suv bilan avtomatik ta’minlash “Ruda-Suv” boshqarish tizimlari joriy etiladi.
Ishlab chiqarishni real vaqt rejimida nazorat qilish va tezkor boshqarish maqsadida MES tizimi ishga tushiriladi. Bu esa uskunalarning foydali ish samaradorligini 5 foizga oshirib, rejadan tashqari to‘xtash vaqti 15 foizgacha qisqartiriladi. Yangi qurilayotgan 3-mis boyitish fabrikasi va mis eritish zavodini kengaytirish loyihalari doirasida texnologik jarayonlarni to‘liq avtomatlashtirish tizimlarini joriy etish istiqbollari belgilangan.