Tush.UZ - Tushlar tabiriGermaniya hukumati oziq-ovqat inqiroziga qarshi kurashish uchun Afg‘onistonga 15 million yevro ajratdi. Bu haqda Etilaatroz nashri xabar berdi.
Xabarda aytilishicha, Germaniya Iqtisodiy hamkorlik va taraqqiyot vazirligi Jahon oziq-ovqat dasturi orqali Afg‘oniston xalqiga yordam ajratish to‘g‘risida bayonot eʼlon qilgan. Yordam hajmi 15 million yevro yoki 16,4 million dollar ekvivalentida belgilangan.Germaniya hukumati 2023-yildan boshlab Berlinning Afg‘onistonga yordamining umumiy miqdori 78 million yevroga yetganini maʼlum qilgan. Germaniyaning yangi yordam paketi nochor qatlamlarning farovonligi va afg‘on maktab o‘quvchilari oziqlanishi uchun ishlatilishi maʼlum qilingan.
Jahon oziq-ovqat dasturining Afg‘onistondagi direktori Syao Vey Lining aytishicha, bu mamlakatda iqlim o‘zgarishining taʼsiri keng tarqalgan. Uning so‘zlariga ko‘ra, qurg‘oqchilik, suv toshqini va boshqa tabiiy ofatlar insonlarga zarar yetkazmoqda.Oziq-ovqat tizimini mustahkamlash esa hozirda har qachongidan ham muhimroqdir.
Manbaga ko‘ra, Germaniyaning 15 million yevrolik yordam paketi 150 ming afg‘on fuqarolarini oziq-ovqat bilan taʼminlashga yordam beradi.
Gumanitar yordam, shuningdek, tibbiy va sanitar vositalardan iborat ekanligi ham aytilgan.
Jahon oziq-ovqat dasturiga ko‘ra, Germaniya Afg‘onistonga 2022-yilda 167 million yevro, 2021-yilda esa 145 million yevro ajratgan. Bu davlat Afg‘onistondagi Jahon oziq-ovqat dasturiga eng ko‘p hissa qo‘shayotgan besh davlat qatoriga kiradi.