Qashqadaryoda yoshlar ishlari bo‘limining sobiq rahbari 2 yilga qamaldi

2023 yilning 21-noyabr kuni Departament va DXXning Nishon tumani bo‘linmalari hamkorligida tezkor tadbir o‘tkazilgan.

Ma’lum bo‘lishicha, Nishon tumani yoshlar ishlari bo‘limi boshlig‘i “Paxtaobod” MFY yoshlar yetakchisini ishda qolish masalasini rahbariyati bilan gaplashib, hal qilganini va qo‘llab-quvvatlab turishini bildirib, evaziga 500 AQSh dollarini talab qilgan.

Tezkor tadbir davomida bo‘lim boshlig‘ining jinoiy sherigi Nishon tumani Yoshlar ishlari bo‘limi Yoshlar daftarini muvofiqlashtirish va yoshlarni kasb-hunarga tayyorlash bo‘yicha bosh mutaxassisi Qarshi shahridagi “Skazka” restorani oldida yoshlar yetakchisidan 500 AQSh dollarini boshlig‘iga olib borib berish uchun olgan vaqtida ushlangan.

Nishon tumani Yoshlar ishlari bo‘limi Yoshlar daftarini muvofiqlashtirish va yoshlarni kasb-hunarga tayyorlash bo‘yicha bosh mutaxassisni o‘z aybiga iqror bo‘lib, tadbirni davom ettirishga rozilik bergan.

Shundan so‘ng, kimyoviy ishlov berilgan 500 AQSh dollari Qashqadaryo viloyati Yoshlar ishlari boshqarmasi binosi oldida turgan Nishon tumani bo‘lim boshlig‘iga olib borib berilgan va bo‘lim boshlig‘i ashyoviy dalillar bilan qo‘lga olingan.

Jinoyat ishlari bo‘yicha Qarshi tumani sudida 2024 yil 6-mart kuni o‘qilgan hukmga ko‘ra, bo‘lim boshlig‘i lavozimida ishlagan shaxs 2 yil muddatga ozodlikdan, 1,6 yil muddat mansabdorlik hamda moddiy javobgarlik lavozimlarida ishlash huquqidan mahrum qilingan.

Joylangan vaqt : (28 Mart 2024 19:00)

Manba: www.aniq.uz