Tush.UZ - Tushlar tabiriFevral oyida aholining kelgusi 12 oylik inflyatsion kutilmalari 13 foizni, tadbirkorlik subyektlariniki 12,7 foizga teng bo‘ldi. Bu haqda Markaziy bank respondentlar bilan o‘tkazilgan so‘rovnomaga tayanib maʼlumot berdi.
Inflyatsiya kutilmalarining omillar ro‘yxatida valyuta kursi o‘zgarishi hamda yoqilg‘i va energiya narxlarining qimmatlashuvi xavotirlari eng yuqori darajada oshgan. Xususan, aholining 56 foizi, korxonalarning 57 foizi valyuta kursining o‘zgarishidan eng ko‘p xavotir bildirgan.
Shu bilan birga, aholining 54 foizi, biznesning 49 foizi kelgusida narxlar oshishi aynan yoqilg‘i va energiya narxlarining oshishi hisobiga yuz beradi, deb hisoblamoqda.
Aholi va tadbirkorlarda kommunal xizmatlar narxi ko‘tarilishi bilan bog‘liq kutilmalar 34–39 foiz, transport qimmatlashishi bo‘yicha 33–35 foiz atrofida shakllangan.
Kelgusida narxlarga oshiruvchi bosim ko‘rsatishi mumkin bo‘lgan asosiy omillar sifatida yoqilg‘i va energiya resurslari qimmatlashishi hamda transport xarajatlari oshishini qayd etgan respondentlar ulushi oshgan bo‘lsa, narxlarni sunʼiy ko‘tarilishini omil sifatida belgilagan respondentlar ulushi kamaygan.
Aholining eng yuqori inflyatsion kutilmalari tibbiyot sohasida (15,5 foiz) qayd etilgan. Kelgusida narxlar shakllanishi bo‘yicha eng past kutilmalar qishloq xo‘jaligi sohasida (11,3 foiz) kuzatilgan. Tadbirkorlik subyektlarining eng yuqori inflyatsion kutilmalari madaniyat va transport sohalarida (13,6 foiz) bo‘lsa, eng past inflyatsion kutilmalar hunarmandlar tomonidan (9,3 foiz) qayd etildi.
Aholi va tadbirkorlik subyektlarining eng yuqori inflyatsion kutilmalari Samarqand viloyati (15,8 – 16 foiz) va Toshkent shahrida kuzatilgan. Eng past kutilmalar esa Qoraqalpog‘iston Respublikasi hamda Xorazm viloyatida (9,1 – 9,7 foiz) qayd etildi.
Markaziy bank so‘rovi natijalariga ko‘ra, daromadlari 7 million so‘mdan yuqori bo‘lgan aholining inflyatsion kutilmalari nisbatan yuqori darajada shakllangan.
Fevral oyida aholi tomonidan sezilgan inflyatsiya darajasi o‘tgan oyga nisbatan biroz sekinlashib, 12,7 foizni tashkil etgan. Sezilgan inflyatsiya darajasining eng yuqori ko‘rsatkichi Toshkent shahri (16,1 foiz) va Sirdaryo viloyatida (13,9 foiz) qayd etilgan bo‘lsa, eng past sezilgan inflyatsiya darajasi Qoraqalpog‘iston Respublikasida (9,1 foiz) kuzatilgan.
Markaziy bank yanvar–fevral oylarida aholi tomonidan bildirilgan narxlarda yuqori o‘sish kuzatilgan asosiy turdagi tovar va xizmatlar bo‘yicha ham axborot bergan. So‘rovda qatnashganlar benzin va yoqilg‘i narxlaridagi o‘sish eng yuqori bo‘lganini aytgan. Yaʼni narxlar qimmatlashishi yanvarda 46 foizni, fevralda 51 foizni tashkil etgan. Keyingi o‘rinda yo‘lkira va tashish xizmatlari narxlaridagi o‘sish eng yuqori ekani qayd etilgan bo‘lib, yanvarda bu ko‘rsatkich 23 foizga, fevralda 32 foizga o‘sgan.
Eslatib o‘tamiz, 2024-yil fevralda O‘zbekistonda yillik inflyatsiya darajasi so‘nggi 8 yil ichidagi eng past darajaga tushib, 8,3 foizni tashkil etgandi.