Tush.UZ - Tushlar tabiri2022-yilning fevral oyidan keyin Rossiya bozoridan chiqib ketish oqibatida xorijiy kompaniyalarning yo‘qotishlari 107 milliard dollardan oshdi. Bu haqda tegishli manbalarga tayanib, Reuters xabar berdi.
Xabarga ko‘ra, yo‘qotishlarning bu hajmi yo‘qolgan daromadlar va Rossiya aktivlarini kompaniyalar balansidan hisobdan chiqarish bilan bog‘liq. Yangi maʼlumotlar 2022-yil fevralida Rossiya-Ukraina urushi boshlanganidan keyin global korporativ sektordagi moliyaviy yo‘qotishlar ko‘lamini ko‘rsatadi.
Rossiyani tark etishga intilayotgan kompaniyalar qo‘shimcha qiyinchiliklarga duch kelishi, aktivlarini katta miqdorda hisobdan chiqarishga majbur bo‘lishi va katta yo‘qotishlarga duchor bo‘lishi mumkin, — deydi S-RM konsalting kompaniyasi vakili Yan Massi Reuters agentligiga.
Agentlik keltirgan Yevropa Ittifoqi menejment maktabi hisobotiga ko‘ra, so‘nggi ikki yil ichida mingga yaqin xorijiy kompaniya Rossiya bozorini tark etgan. Shu bilan birga, yuzlab kompaniyalar, jumladan, fransuz Auchan konglomerati va Italiya kiyim-kechak ishlab chiqaruvchisi Benetton Group o‘zaro hamkorlikni saqlab qolgan.
Reuters ko‘plab xorijiy isteʼmol tovarlari ishlab chiqaruvchilari o‘z mahsulotlari rus isteʼmolchilariga zarurligini aytib, Rossiyadagi bizneslarini qisqartirmoqchi emasligini qo‘shimcha qilgan.
Nashrning 2023-yil avgust oyida e’lon qilgan so‘nggi hisob-kitoblardan beri xorijiy kompaniyalarning Rossiya bozoridan chiqib ketishi tufayli yo‘qotishlari hajmi uchdan biriga oshgan. O‘sha paytda bu ko‘rsatkich 80 milliard dollar bo‘lgan.