Tush.UZ - Tushlar tabiriO‘tgan yili O‘zbekiston kafolati ostidagi xorijiy kreditlar hisobidan 21,2 trillion so‘m investitsiyalar o‘zlashtirilgan. Bu haqda Statistika agentligi maʼlumot berdi.
Agentlik tahliliga ko‘ra, 2023-yilning yanvar–dekabr oylarida asosiy kapitalga jami 352,1 trillion so‘mlik investitsiyalar o‘zlashtirilgan. Shundan 21,2 trillion so‘mi O‘zbekiston Respublikasi kafolati ostidagi xorijiy kreditlar hisobidan moliyalashtirilgan. Mazkur kreditlarni o‘zlashtirishning eng yuqori ulushi Toshkent shahrida (8,2 trillion so‘m) qayd etilgan. Eng past ko‘rsatkich esa Jizzax viloyatida — 328,5 milliard so‘m.
O‘zbekiston kafolati ostidagi xorijiy kreditlar hisobidan moliyalashtirilgan asosiy kapitalga investitsiyalarning eng yuqori ulushi Xitoy (25,6 foiz), Rossiya (13,4 foiz), Saudiya Arabistoni (7,9 foiz) va Turkiya (6,4 foiz) mamlakatlari hissasiga to‘g‘ri kelgan.
Statistik raqamlarga qaraganda, bundan 5 yil ilgari, yaʼni 2019-yilda asosiy kapitalga 189,9 trillion so‘mlik investitsiyalar o‘zlashtirilgan. Shundan O‘zbekiston kafolati ostida jalb qilingan xorijiy kreditlar 27,9 trillion so‘mni tashkil etgan.
2020-yilda 202 trillon so‘m investitsiyalar o‘zlashtirilgan bo‘lib, shundan 22,5 trillion so‘mi (2019-yildagidan 11,1 foiz kam) respublikda kafolati ostidagi xorijiy kreditlar hisobidan moliyalashtirilgan.
Agentlik maʼlumotlarida 2021-yilda mamlakatda asosiy kapitalga 245 trillion so‘mlik investitsiyalar o‘zlashtirilgani keltirilgan. Shundan 17,3 trillion so‘mi O‘zbekiston hukumati kafolati ostidagi xorijiy kreditlar hissasiga to‘g‘ri keladi.
2022-yilda asosiy kapitalga jami 269,9 trillion so‘mlik investitsiyalar o‘zlashtirilgan. Buning 15,2 trillion so‘mi hukumat kafolati ostidagi xorijiy kreditlar hisobidan moliyalashtirilgan.