Tush.UZ - Tushlar tabiriStatistika agentligi maʼlumotlariga ko‘ra, mamlakatda qazib olinayotgan tabiiy gaz hajmi yildan yilga qisqarib bormoqda.
O‘zbekistonda joriy yilning yanvar va fevral oylarida jami 7,7 milliard kub metr tabiiy gaz qazib olindi. Bu ko‘rsatkich 2023-yilning yanvar—fevral oylaridagidan 454,8 million kub metrga kam degani.
Respublikada o‘tgan yili so‘ngi yetti yil ichidagi eng kam — 46,7 mlrd metr kub gaz qazib olingandi. Bu ko‘rsatkich 2017-yildagi ko‘rsatkichdan (56,4 mlrd metr kub) 9,7 mlrd kub metrga kam.
Avvalroq “O‘zbekneftgaz”AJ gaz qazib olishda prognozlari hajmini pasaytirib borayotgani maʼlum qilingandi. Kompaniya 2023-yilda dastlab 34,1 mlrd kub metr gaz qazib olishni rejalashtirgan bo‘lsa, keyinroq bu raqam 32,2 mlrd kub metrga pasaytirilgan. Ammo o‘tgan yilda qazib olingan gaz hajmining qancha ulushi “O‘zbekneftgaz” hissasiga to‘g‘ri kelishi ochiqlanmadi. Joriy yilgi davlat dasturida belgilanishicha, mazkur kompaniya 2024-yilda 29,3 mlrd kub metr, yaʼni o‘tgan yildagi hajmdan deyarli 3 mlrd kub metr kamroq gaz ishlab chiqarishi mumkin.
O‘zbekiston gaz qazib olishning qisqarishi fonida import hajmini oshirmoqda. Respublika 2020-yilda xorijdan 50,4 mln dollarlik gaz import qilgan bo‘lsa, 2021-yilda bu raqam 154,5 mln dollarga, 2022-yilda esa 281,9 mln dollarga yetgan. 2023-yilda esa gaz importi hajmi qolgan yillardagiga qaraganda sezilarli oshib, 694,9 mln dollarga yetgan. Joriy yilda gaz importi hajmi rekord darajada o‘sishi mumkin. Chunki respublika yanvar—fevral oylarida 166,7 mln dollarlik gaz import qildi. Bu ko‘rsatkich 2021-yildagi yillik raqamlardan ko‘ra ko‘proqdir.