Tush.UZ - Tushlar tabiriToshkent viloyatining Toshkent tumanida mahalla profilaktika inspektori pichoqlandi. Bu haqda “Daryo” manbasi xabar berdi.
Bildirilishicha, voqea kecha, 8-aprel kuni soat taxminan 21:10 da sodir bo‘lgan.
Toshkent tumanidagi “Qorasaroy” mahalla fuqarolar yig‘inida yashovchi aka-uka o‘zaro janjallashib qolgach, muqaddam sudlangan aka ukasini o‘ldirish uchun unga pichoq o‘qtalgan. Bundan qo‘rqib ketgan uka voqea joyidan qochib chiqib, hudud profilaktika inspektoriga xabar bergan. IIB xodimi voqea joyiga yetib kelganda aka hamon hovuridan tushmagan bo‘lgan. U profilaktika inspektorining ogohlantirishlariga qaramay, qo‘lidagi pichog‘ini tashlamagan. Boz ustiga IIB xodimiga ham qarshilik ko‘rsatib, uni pichoqlab qo‘ygan, — deydi manba.
Manbaning qo‘shimcha qilishicha, ayni paytda IIB xodimi shifoxonaga yotqizilgan.
Bosh prokuratura axborot xizmati rahbari Hayot Shamsutdinovning “Daryo” so‘roviga javoban ma’lumot berishicha, holat bo‘yicha Jinoyat kodeksining 219-moddasi 2-qismi (xizmat vazifasini bajarayotgan hokimiyat vakiliga burchini bajarishdan voz kechishga, shuningdek, qonunga xilof harakatlar sodir etishga majbur qilish) bilan jinoyat ishi qo‘zg‘atilgan. Fuqaro protsessual tartibda ushlangan. Tuman prokuraturasi tomonidan dastlabki tergovga qadar tekshiruv harakatlari olib borilmoqda.