Tush.UZ - Tushlar tabiriToshkent shahrida joylashgan “Oloy dehqon bozori” AJning o‘tgan yili ko‘rgan sof foydasi 2022-yildagidan ikki barobardan ko‘proq o‘sdi. Biroq mazkur daromadlar to‘liq avvalgi davrlarda ko‘rilgan zararlarni qoplashga yo‘naltirilgan. Bu haqda Ochiq maʼlumotlar portalida axborot berilgan.
Portalda “Oloy dehqon bozori” AJ tomonidan 2018–2023-yillarda ko‘rilgan sof foydalar bo‘yicha qisqa maʼlumotlarni ko‘rish mumkin. Xususan, bozorning 2023-yil yakuni bo‘yicha ko‘rgan sof foydasi 661 million 405 ming so‘mni tashkil etgan. Qarorga ko‘ra, ushbu mablag‘larning barchasi avvalgi yillardagi zararlarni qoplashga yo‘naltiriladi. Biroq bozor maʼmuriyati zararning moliyaviy tarkibini ochiqlamagan.
Portal maʼlumotlariga qaraganda, “Oloy dehqon bozori” AJ 2022-yilda 285 million 285 ming so‘m sof foyda olgan. Pullar to‘liqligicha 1,1 milliard so‘mlik zararning (bu zarar qaysi yillarda, qanday yig‘ilib qolgani yozilmagan) bir qismini qoplashga yo‘naltirilgan. Natijada so‘ndirilmagan (to‘lanmagan qarz) miqdori 834 milliard so‘m qolishi yozilgan.
Umuman olganda, portalda keltirilgan maʼlumotlarga nazar tashlansa, bozorning so‘ngi yetti yil davomida ko‘rayotgan foydalari o‘tgan yillardagi zararlarni qoplashga sarflanayotgani ko‘rinadi.
Masalan, bozor 2021-yil yakuni bo‘yicha 230 million 322 ming so‘m sof foyda olgan. O‘sha vaqtda ham ko‘rilgan foydaning barchasi avvalgi yillardagi zararni qoplashga sarflangan. Shu bilan birga, “Oloy dehqon bozori” AJ 2018-yilda 131,9 million so‘m, 2019-yilda 155,6 million so‘m, 2020-yilda 395,9 million so‘m sof foyda ko‘rgan va mablag‘larning barcha qismi avvalgi yillardagi zararni qoplashga yo‘naltirilgan.
Avvalroq poytaxtdagi “Mirobod dehqon bozori” AJ 2023-yilda 2 milliard so‘mdan ziyod sof foyda ko‘rgani xabar qilingandi. Bozor maʼmuriyati mazkur mablag‘lardan 50 foizini ajratmalar va davlat ulushi bo‘yicha dividendlarga o‘tkazadi. Jamiyat kuzatuv kengashi, boshqaruv organlari va xodimlarini 2023-yil yakuni bo‘yicha rag‘batlantirishga 554 million so‘m yo‘naltiradi. Qolgan 513 million so‘m sof foyda jamiyatning moddiy texnika bazasini mustahkamlash va rivojlantirishga yo‘naltiriladi.
Eslatib o‘tamiz, 2022-yilda “Mirobod” dehqon bozori Toshkentdagi dehqon bozorlari orasida eng ko‘p sof foyda (1,7 milliard so‘m) olgandi.