Tush.UZ - Tushlar tabiriMamlakatimiz elchixonasi ko‘magida Kuvaytning "Rawasi Kuwait Holding Co." xoldingining investisiya va moliya bo‘yicha direktori Jasim Yusuf al-G‘onimning O‘zbekistonga biznes-missiyasi tashkil etildi, deb xabar qilmoqda "Dunyo" AA muxbiri.
Kuvayt vakili safar davomida O‘zbekiston Investisiyalar, sanoat va savdo, Qishloq xo‘jaligi, Energetika vazirliklari, "O‘zbekneftegaz" hamda "BMB" kompaniyalari mutasaddilari bilan ikki tomonlama hamkorlikni yo‘lga qo‘yish yuzasidan muzokaralar o‘tkazdi.
Uchrashuvlar davomida neft va gazni qayta ishlash, saqlash va logistikasiga oid loyihalarga hamda qishloq xo‘jaligi sohasiga investisiya kiritish masalalari muhokama qilindi.
Bo‘lib o‘tgan muzokaralar natijasida tomonlar hamkorlikning aniq yo‘nalishlari va ularga xorijiy investisiyalarni jalb etish bo‘yicha dastlabki kelishuvga erishdilar.
"Rawasi Kuwait Holding Co." investisiyaviy xolding kompaniyasi 1982 yilda "Boodai Group" korporasiyasi huzurida tashkil etilgan. Xolding 15 ta turli kompaniyalarni o‘z ichiga oladi. Kompaniyaning asosiy kapital hajmi 32,5 million AQSh dollarini, boshqaruv aktivlari esa 50 million dollarni tashkil qiladi.