Tush.UZ - Tushlar tabiriAQSh mudofaa vaziri Lloyd Ostin Vashington va Pekin o‘rtasidagi munosabatni yaxshilash maqsadida xitoylik hamkasbi admiral Dong Jun bilan batafsil suhbatlashdi. Bu ikki qudratli mamlakat mudofaa sohasi yetakchilari 2022 yil noyabrdan beri muloqot qilmagan edi. E’tiborlisi, mazkur telefon suhbati Davlat kotibi Entoni Blinkenning shu oy Xitoyga mo‘ljallangan tashrifi oldidan bo‘lib o‘tgan.
Ma’lumki, AQSh Xitoy harbiylari bilan aloqani yaxshilash orqali Hind-Tinch okeani mintaqasida keskinlikni kamaytirishga harakat qilmoqda. 2022 yil avgustda Vakillar palatasi spikeri Nensi Pelosining Tayvanga tashrifidan so‘ng Pekin ma’muriyati ikki davlat harbiylari o‘rtasidagi yuqori darajali aloqani to‘xtatdi.
Pelosi Xitoy va AQSh o‘rtasida keskinlik kuchaygani, Pekin ma’muriyatining qoralashi va ogohlantirishiga qaramay, orolga bordi. Qo‘shma Shtatlar Tayvan xalqi bilan birdam ekani haqida bayonot berdi. Ikki davlat munosabati Prezident Jo Bayden va Rais Si Szinpinning 2023 yil 15 noyabr kuni Kaliforniyada bo‘lib o‘tgan Osiyo-Tinch okeani iqtisodiy hamkorligi sammiti doirasidagi muzokarasidan so‘ng yana pasaya boshladi.