Tush.UZ - Tushlar tabiriTverning Moskva tuman sudi Crocus City Hall’dagi teraktga aloqador shaxslarni yashash manzilida soxta ro‘yxatga qo‘yganlikda ayblab, Rossiya va Tojikiston fuqarolarini ikki oyga hibsga oldi. Bu haqda Meduza xabar berdi.
Sud matbuot bayonotida ayblanuvchi Ashurov deb ko‘rsatilgan. U Jinoyat kodeksining 322.2-moddasi bilan yashash joyi bo‘yicha soxta “propiska” qilishda ayblanmoqda.
Ayblovga ko‘ra, Ashurov aka-uka Dilovar va Aminchon Islomovlarni soxta ro‘yxatga olgan. Islomovlar 22-mart kuni Crocus City Hall’ga hujum qilgan terrorchilarni kvartira va mashina bilan taʼminlash, shuningdek, pullarini olib o‘tishda ayblanmoqda. Har ikkisi terrorchilik moddasi bo‘yicha hibsga olingan.
Sud xulosasiga ko‘ra, Ashurov o‘z aybiga to‘liq iqror bo‘lgan. Uning Tojikistonda yaqin qarindoshlari yashagani sababli tergovchilar qochib ketmasligi uchun hibsga olishni so‘ragan.
Soxta ro‘yxatga qo‘yish moddasi bo‘yicha maksimal jazo uch yilgacha ozodlikdan mahrum qilishdan iborat.
Dilovar va Aminchon Islomovlar hamda ularning otasi 25-mart kuni, teraktdan uch kun o‘tib hibsga olingan edi. Bu vaqtgacha to‘rtta asosiy jinoyatchi allaqachon hibs qilingan hamda Islomovlar terrorchilarni mashina va uy-joy bilan ta’minlashda yordam berganini tan olgan.
Aka-uka Islomovlarning aytishicha, terrorchilar qochishga uringan mashinani tanib, Tergov qo‘mitasiga o‘zlari kelgan. Sud majlisida Aminchon Islomov o‘zining aybsizligini ta’kidlagan. Uchalasi ham hibsga olish yuzasidan apellyatsiya bergan, biroq Moskva shahar sudi ularni hibsda qoldirgan.