Tush.UZ - Tushlar tabiriO‘zbekiston Koreya bilan diniy ta’limda hamkorlik qiladi, deb xabar bermoqda Musulmonlar idorasi axborot xizmati.
Ma’lum qilinishicha, 16-aprel kuni O‘zbekiston musulmonlari idorasi raisi, muftiy Shayx Nuriddin Xoliqnazarovning Janubiy Koreyaga safari boshlandi. Kunning birinchi yarmida muftiy Janubiy Koreya musulmonlari federatsiyasi prezidenti Xvang Byong Xa-Ahmad va Janubiy Koreya musulmonlari jamoati bosh imomi Li Ju Xva-Abdurahmon Li bilan uchrashuv o‘tkazdi.
Federatsiya prezidenti O‘zbekiston delegatsiyasining tashrifi bilan qutlab, Imom Buxoriy, Imom Termiziy kabi ulug‘ zotlar va Samarqand, Buxoro, Xiva kabi tarixiy shaharlar musulmon olami e’tiborini qozongani, qadamjo va maqbaralar dunyoning turli burchaklaridan ziyoratchilarni o‘ziga jalb etishini e’tirof etgan.
Muloqotda muftiy mamlakatlar o‘rtasidagi hamkorlik tobora rivojlanib borayotgani, diniy idoralar o‘rtasida aloqalari yo‘lga qo‘yilgani, o‘tgan ramazon oyida bir guruh o‘zbekistonlik ulamolar Janubiy Koreyaning Seul, Kojedo, Kimxe, Cheongju, Mokpo kabi shaharlardagi tadbirlarda mahalliy aholi va vatandoshlar bilan ma’rifiy suhbatlar o‘tkazganini aytib o‘tdi.
O‘zbekistondagi so‘nggi yillarda amalga oshirilgan islohotlar, diniy jabhadagi yangilanishlar to‘g‘risida ma’lumot berildi. Shuningdek, marosim ishtirokchilariga O‘zbekiston sayyohlik salohiyatiga bag‘ishlangan rolik namoyish etildi va tarqatma materiallar taqdim etildi.
Uchrashuv yakunida O‘zbekiston musulmonlari idorasi va Janubiy Koreya musulmonlari federatsiyasi o‘rtasida hamkorlikni yanada rivojlantirish uchun asos bo‘ladigan anglashuv memorandumi imzolandi. Mazkur hujjat asosida diniy sohadagi hamkorlikni mustahkamlash, diniy ta’lim va imom-xatiblar tajriba almashinuvini yo‘lga qo‘yish, yot g‘oyalarga birgalikda qarshi kurashish va hamkorlikda anjumanlar o‘tkazish kabilar amalga oshiriladi.
Shuningdek, Janubiy Koreyada mehnat migrantlari ko‘p joylashgan hududlardagi jome masjidlarda o‘zbekistonlik imom-xatiblarning uzluksiz ma’rifiy suhbatlar tashkil etish imkoniyatlari paydo bo‘ladi.