Tush.UZ - Tushlar tabiriTermiz shahridagi “Matbuot uyi”da Ijtimoiy himoya milliy agentligi Surxondaryo viloyati boshqarmasi, O‘zbekiston milliy paralimpiya qo‘mitasi viloyat hududiy bo‘limi, O‘zbekiston Jurnalistlari uyushmasi Surxondaryo viloyati bo‘limi, Yoshlar ishlari agentligi viloyat boshqarmasi hamkorligida paralimpiya musobaqasiga tayyorgarlik ko‘rish va uni o‘tkazishga bag‘ishlangan matbuot anjumani o‘tkazildi. Tadbirda markaziy va mahalliy ommaviy axborot vositalari vakillari ishtirok etdi.
Matbuot anjumanida mamlakatimizda ijtimoiy himoyaga muhtoj oilalar va nogironligi bo‘lgan yurtdoshlarimizga ko‘rsatilayotgan e’tibor haqida so‘z yuritildi. Jismoniy imkoniyati cheklangan insonlar salomatligini tiklashi, sport bilan shug‘ullanishi uchun katta imkoniyatlar yaratilayotgani yuzasidan fikr almashildi.
Tibbiy ijtimoiy ekspert komissiyalari xulosasiga ko‘ra, viloyatda 8 ming 298 nafar nogironligi bo‘lgan shaxsga parasport bilan shug‘ullanish uchun yo‘llanma berilib, ulardan 326 nafari parasportga jalb etilgan.
— Ayni paytda viloyatda paralimpiya yo‘nalishi bo‘yicha 12 ta sport turi shakllantirilib, 716 nafar jismoniy imkoniyati cheklangan va nogironligi bo‘lgan yosh sportchi o‘zlari qiziqqan parasport turlari bilan shug‘ullanmoqda, — dedi O‘zbekiston Milliy paralimpiya qo‘mitasi viloyat hududiy bo‘limi boshlig‘i Abduolim Usmonov. — Ular viloyat va mamlakat miqyosida o‘tkazilayotgan bellashuvlarda ham faol ishtirok etmoqda. 16 nafar parasportchi beshta parasport turidan jahon musobaqalarida qatnashib, sovrinli o‘rinlarni qo‘lga kiritdi. Endilikda biz parasport bilan shug‘ullanish istagida bo‘lgan barcha vohadoshlarimizni sportga qamrab olib, paralimpiya yo‘nalishi bo‘yicha sport turlarini 15 taga yetkazmoqchimiz.
Anjumanda jismoniy imkoniyati cheklangan va nogironligi bo‘lgan yoshlar o‘rtasida “Besh tashabbus paralimpiyadasi” ommaviy sport musobaqalariga viloyatda ko‘rilayotgan tayyorgarlik ishlari va uning quyi bosqichlarini o‘tkazish tartiblari to‘g‘risida ma’lumot berildi. Jurnalistlarni qiziqtirgan savollarga atroflicha javob qaytarildi.
Tadbir yakunida Ijtimoiy himoya milliy agentligi viloyat boshqarmasi tomonidan Termiz davlat universiteti talabasi, II guruh nogironi, dizayner Zuhra Hasanova va jurnalist Abrorbek Qurbonmurodov tashakkurnoma bilan taqdirladi.