Tush.UZ - Tushlar tabiriRossiyalik muxolifatchi Aleksey Navalniyning bevasi Yuliya Navalnaya Amerikaning Time jurnali talqiniga ko‘ra, dunyodagi eng nufuzli 100 kishi ro‘yxatiga kiritildi. U nashrga turmush o‘rtog‘i vafotidan keyin ilk marta intervyu berdi.
Suhbat Vilnyusda, Navalniy vafotidan bir oy o‘tib bo‘lib o‘tgan edi.
Navalnayaning so‘zlariga ko‘ra, u erining o‘limi haqida Myunxen konferensiyasidagi chiqishidan oldin Rossiya matbuotidagi xabarlardan bilgan. Bu kabi xabarlar faqat Rossiya rasmiy manbalari ma’lumotlariga asoslanganligi sababli, Navalnaya avval hammasini aniqlab olish kerak degan qarorga kelgan.
Navalnaya erini oxirgi marta 2022-yil fevral oyi o‘rtalarida, Rossiyaning Ukrainaga hujumi boshlanishidan sal avval ko‘rgan.
U bilan telefonda gaplashish imkoni bo‘lmagan. Ehtimol, bir yoki ikki marta, juda qisqa. Yozda, tug‘ilgan kunimda u menga qo‘ng‘iroq qilishga muvaffaq bo‘lgan. “Salom, salom” degan va darhol aloqa uzilgan. O‘shanda uning men bilan salomlashganini oxirgi marta eshitgan edim, — deydi Navalnaya.
Siyosatchi bevasining so‘zlariga ko‘ra, u yetakchisiz qolgan tarafdorlarini qo‘llab-quvvatlash va Vladimir Putin rejimidan norozi rossiyaliklarga umid bog‘lash maqsadida erining ishini davom ettirishga qaror qilgan. Navalnaya eri bilan hech qachon uning ishini davom ettirish masalasini muhokama qilmagan.
Men Kreml va uning rasmiylari tushunishlarini xohlayman: ular Alekseyni o‘ldirgan bo‘lsa, men uning o‘rnini egallayman. Agar menga biror narsa qilishsa, boshqa odam keladi, — dedi Navalnaya.
Uning fikricha, Rossiyaga qarshi amaldagi G‘arb sanksiyalari ish bermayapti. U mazkur sanksiyalar faqat “Putinning do‘stlari va uning yaqin doiralari a’zolari”ga qaratilgan bo‘lishi kerakligini aytgan.
Navalnaya AQSH prezidenti Jo Bayden bilan shaxsiy uchrashuvda sanksiyalar masalasini muhokama qilgan.
Siyosatchining bevasi aytganidek, G‘arb Rossiya prezidenti “qizil tugmachani bosib, yadro qurolini qo‘llashidan” qo‘rqib, Putin va uning atrofidagilarga qarshi sanksiyalarni kechiktirayotgan bo‘lishi mumkin.
Putin mendan qo‘rqadimi yoki yo‘qmi, menga farqi yo‘q. Men Putinga qarshi kurashaman. U mening dushmanim, — deya Navalnaya erining o‘limi uchun Rossiya prezidentini javobgar ekanligini taʼkidlagan.
U targ‘ibotchilar va Rossiya rasmiylari tomonidan unga nisbatan bosim kuchayishiga tayyorligini aytgan.