Smorodinaning shifobaxshligi, xalq orasida ko‘p iste’mol qilinishi va tovarbopligi uchun ushbu o‘simlikni respublika tuproq-iqlimi sharoitida o‘rganish va uning sanoat plantasiyalarini yaratish masalasi bugungi kunda har qachongidanda dolzarb ahamiyatga ega. Bu borada Toshkent Davlat Agrar universiteti yosh olimasi, qishloq xo‘jaligi fanlari bo‘yicha falsafa doktori Durdona Janakovaning ilmiy izlanishlari e’tiborga molik.
- Smorodina, ya’ni qorag‘at o‘simligi bugungi kunda ko‘plab xo‘jaliklarda yetishtirilmoqda. Ilmiy ishim bu o‘simlikni halqqa tanitish, ko‘chatlarini yetishtirish, jadallashgan texnologiyasini yaratishdan iborat, - deydi Durdona Janakova. – Oltinsimon smorodina ko‘proq issiqqa, sovuqqa chidamli bo‘lgani uchun O‘zbekiston sharoitida ko‘proq yetishtiriladi. Oltinsimon qorag‘atdan tashqari qizil, qora va oq qarag‘atlar ham yurtimizda ko‘plab tarqalgan. Oltinsimon qarag‘at ko‘z kasalliklariga davo, lekin qora turining shifobaxshligi yanada ko‘proq.
So‘nggi yillarda davlatimiz tomonidan mevachilikni rivojlantirish, ularning assortimentlarini hamda eksport hajmini oshirishga, past samarali bog‘lar o‘rnida yuqori daromad keltiradigan intensiv bog‘lar yaratishga alohida e’tibor berilmoqda. Zero, O‘zbekiston Respublikasini yanada rivojlantirish bo‘yicha “Harakatlar strategiyasi”da: “Mamlakat oziq-ovqat xavfsizligini yanada mustahkamlash, ekologik toza mahsulotlar ishlab chiqarishni kengaytirish, agrar sektorning eksport salohiyatini sezilarli darajada oshirish” masalasi alohida belgilab qo‘yilgan. Smorodina plantasiyalarining yaratilishi esa albatta kelgusida quyoshli yurtimizda yetishtirilgan ushbu rezavorning dunyo bozorlariga chiqarishga va mahalliy iste’molchilarga arzon narxlarda yetkazib berishga xizmat qiladi.