Tush.UZ - Tushlar tabiriQorabog‘ mojarosi hududida o‘t ochishni to‘xtatish va harbiy amaliyotlarni kuzatish bo‘yicha Rossiya-Turkiya qo‘shma markazi o‘z ishini yakunlamoqda. Bu haqda Turkiya Mudofaa vazirligi rasmiy vakili Zeki Akturk jurnalistlarga ma’lum qildi.
“Rossiya Federasiyasi va Ozarbayjon bilan kelishilgan holda, 2021 yil 30 yanvarda Ag‘dam shahrida Turkiya Respublikasi va Rossiya Federasiyasi o‘rtasidagi memorandum doirasida hamda Tog‘li Qorabog‘da o‘t ochishni to‘xtatish rejimini kuzatish va buzilishlarning oldini olish maqsadida tuzilgan Turkiya-Rossiya qo‘shma markazining missiyasini yakunlash bo‘yicha ishlar davom etmoqda”, deya Akturkning so‘zlaridan iqtibos keltirmoqda “Anadolu” agentligi.
2020 yil 9 noyabr kuni Rossiya Prezidenti Vladimir Putin, Ozarbayjon Prezidenti Ilhom Aliyev va Armaniston Bosh vaziri Nikol Pashinyan Tog‘li Qorabog‘dagi harbiy harakatlarni to‘liq to‘xtatish to‘g‘risidagi qo‘shma bayonotni imzoladilar. Rossiya rahbari o‘shanda aytganidek, Ozarbayjon va Armaniston tomonlari o‘z ishg‘ol qilgan pozisiyalarida qolmoqda, Rossiya tinchlikparvar kuchlari esa mintaqada joylashtiriladi. Hulusi Akar va Rossiya Mudofaa vaziri Sergey Shoygu o‘rtasida 11 noyabr kuni video aloqa orqali o‘tkazilgan muzokaralar natijasida Tog‘li Qorabog‘da o‘t ochishni to‘xtatish va uch tomonlama kelishuvlar shartlariga rioya etilishini nazorat qilish uchun qo‘shma Rossiya-Turkiya markazini yaratish bo‘yicha memorandum imzolangan edi.
Eslatib o‘tamiz, joriy yilning 17 aprel kuni Ozarbayjon Prezidentining yordamchisi – Prezident ma’muriyati tashqi siyosat bo‘limi boshlig‘i Hikmat Hojiyev Rossiya va Ozarbayjon oliy rahbariyatining qaroriga ko‘ra, shu kuni Rossiya tinchlikparvar qo‘shinlarini Qorabog‘ hududidan muddatidan oldin olib chiqish boshlanganini ma’lum qildi.
Rossiya Prezidenti matbuot kotibi Dmitriy Peskov Qorabog‘dan rossiyalik tinchlikparvar kuchlarni olib chiqish boshlanganini tasdiqladi.